Wasu ‘yan bindiga da ba a kai ga tantance adadinsu ba ya zuwa wannan lokaci sun kutsa kai cikin garin Dutsinma na jihar Katsina, inda suka harbe wani malamin jami’ar tarayya ta FUDMA da aka bayyana sunansa da Dr Tiri.
Majiyar DCL Hausa ta kuma ce maharan sun kuma yi awon-gaba da ‘ya’yansa biyu da ba a sanar da jinsinsu ba, wato maza ne ko mata, ko kuma mace da namiji.
Lamarin ya faru a daren Litinin wayewar Talata da misalin karfe 1am.
Majiyar ta ce yanzu haka gawar Dr Tiri da ke koyarwa a sashen tattalin arziki na fannin noma na can a babban asibitin garin Dutsinma jihar Katsina.
Kakakin rundunar ‘yan sandan jihar Katsina ASP Aliyu Abubakar Sadiq bai kai ga amsa kiran wayar da DCL Hausa ta yi masa ba kan lamarin.
