An gurfanar da wata mai gyaran gashi bisa zargin satar katin ATM da naira 80,000 na kwastomarta
Wata mai sana’ar gyaran gashi mai suna Martina Auta ‘yar shekara 30, wacce ake zargi da sace wa kwastomar ta naira 80,000 da katin ATM guda biyu a ranar Laraba, ta gurfana a gaban wata kotun majistare da ke Kaduna.
Ita dai wadda ake zargin wacce ke zaune a Narayi a Kaduna, tana fuskantar tuhume-tuhume biyu da suka hada da cin amana da sata, kuma ta musanta aikata laifin.
Mai gabatar da kara, Sufeta Chidi Leo, ya ce wadda ake kara ta aikata laifin ne a ranar 20 ga watan Maris a unguwar Barnawa da ke Kaduna da misalin karfe 3:00 na rana.
Leo ya shaidawa kotun cewa wadda ake tuhuma ta sace naira 80,000 da kuma katin ATM guda biyu a cikin jakar hannun Misis Rose Adams, wacce ta zo gyaran gashin kanta.
