Sama da dalibai miliyan 1.5 daga cikin 1,955,069 ne da suka zana jarrabawar shiga manyan makarantu ta JAMB a shekarar 2025, suka samu kasa da maki 200 a jarrabawar.
Wannan bayanin na cikin kididdigar sakamakon na shekarar 2025 da hukumar shirya jarabawar shiga jami’a JAMB ta fitar ranar Litinin.
Kididdiga ta nuna cewa dalibai 420,415 ne kawai da suka zana jarrabawar suka samu sama da maki 200 a wannan shekarar.
Bayanai sun nuna cewa kashi 75 cikin 100 na wadanda suka zana jarrabwar sun samu maki kasa da 200 a jarrabawar, inda kasa da kashi daya cikin dari suka samu sama da maki 300.
