Wani mutum a Minna, Jihar Neja, ya saki matarsa a cikin caji ofis bayan jami’an tsaro sun cafke ta a wani samame da aka kai otal, inda ake zargin ‘yan sara-suka da masu safarar miyagun kwayoyi ke buya.
Wata majiya daga cikin jami’an tsaron ta shaidawa Daily Trust cewa matar na cikin wadanda aka kama yayin da aka kai farmaki otal-otal da ake kyautata zaton su ne mafakar bata-gari da masu shaye-shaye a cikin birnin Minna.
A cewarsa, asalin matsayin matar a matsayin wadda ke da aure bai bayyana ba sai bayan an kaisu caji ofis, sannan ‘yan uwanta da na wasu daga cikin wadanda aka kama suka iso.
