‘Yan bindigar da suka yi garkuwa da wasu masu yi wa kasa hidima (NYSC) kwanaki uku da suka gabata a jihar Kogi sun bukaci a biya kudin fansa har naira miliyan 20 a kan kowane mutum daya.
Lamarin ya faru ne a lokacin da matasan ke kan hanyarsu ta komawa Abuja daga jihar Bayelsa bayan kammala kwas din horaswa na makwanni uku a sansanin ‘yan bautar kasa, inda maharan suka tare su a kan babbar hanyar Aloma zuwa Egane da ke karamar hukumar Ofu a jihar Kogi.
Wani dan uwan daya daga cikin wadanda aka sace ya bayyana cewa maharan sun tuntubi iyalan yarinyar tare da gabatar da bukatar kudin fansar, kamar yadda jaridar Daily Trust ta ruwaito.
A cewar majiyar, “Daya daga cikin ‘ya’yanmu da aka sace a kan hanyarsu ta dawowa Abuja daga jihar Bayelsa bayan kammala sansanin horaswa na makwanni uku, masu garkuwar sun bukaci a biya naira miliyan 20 a matsayin kudin fansa.”
Wannan batu na zuwa ne bayan da rundunar ‘yan sandan jihar Kogi ta tabbatar da sace fasinjojin ciki har da masu yi wa kasa hidimar a kan wannan hanya.
Rundunar ta bayyana cewa hadin gwiwar jami’an tsaro ya yi nasarar kubutar da mutum 11, ciki har da direbobin motocin guda biyu da lamarin ya shafa, yayin da ake ci gaba da aikin ceto sauran wadanda ke hannun ‘yan bindigar.
A halin da ake ciki, iyalan wadanda aka sacen sun yi kira ga gwamnatin tarayya, mahukuntan shirin NYSC, da kuma hukumomin tsaro da su kara kaimi wajen ganin an kubutar da ‘ya’yansu cikin koshin lafiya.
 da suka sace.){kind=link}