Home Labarai Afirika za ta shiga rikicin tattalin arziƙi mafi muni na farko cikin...

Afirika za ta shiga rikicin tattalin arziƙi mafi muni na farko cikin shekara 25

129
0

Bankin duniya ya yi hasashen cewa ƙasashen Afirika za su fuskanci mummunan koma bayan tattalin arziƙi a shekarar 2020 sakamakon ɓarkewar cutar coronavirus.

Wani rahoto da bankin ya fitar jiya Alhamis ya ce ƙasashen na yankin Sahara za su samu faɗuwar tattalin arziƙi da ba a taɓa samun irin ta ba tun bayan rikicin tattalin arziƙi na farko da Nahiyar ta shiga shekaru 25 da suka wuce.

A cewar rahoton tattalin arziƙi na bankin duniyar, ƙasashen Afirika za su yi asara daga Dala Biliyan 37 zuwa Dala Biliyan 79 a bana.

Rahoton ya ce ɓarkewar cutar zai mayar da hannun agogo baya ga ci gaban da tattalin arziƙin Nahiyar fiye da ninkin ci gaban da aka samu a shekarar 2019.

Da yake sharhi kan rahoton mataimakin shugaban bankin duniya a Nahiyar Afirika Hafez Ghadem ya ce ƙasashen Afirika su ne za su fi ji a jikin su sakamakon ɓarkewar cutar da take ci gaba da mamaye duniya.

Marubuta rahoton sun ce duk da cewa halin da ake ciki yanzu ya janyo koma baya a dukkan ɓangarori, amma lamarin zai fi yin illa ne a manyan ƙasashen da suka fi ci gaban tattalin arziƙi a Nahiyar watau Nijeriya, Angola da Afirika ta Kudu saboda koma bayan da suke fuskanta na tattalin arziƙi da zuba jari.

Ziyarci shafin Facebook na DCL Hausa
Ziyarci shafin Facebook na DCL Hausa
 

Leave a Reply