Gwamnan jihar Katsina, Malam Dikko Umar Radda, ya ce gwamnatinsa za ta nemi wa’adi na biyu a zaɓen 2027 ne bisa ayyukan da ta aiwatar, ba tare da dogaro da sabbin alkawura ba.
Gwamna Radda ya bayyana hakan ne a ranar Juma’a yayin ƙaddamar da shugabannin APC Zalla Movement na ƙananan hukumomi 34 da mazabu 361 a birnin Katsina.
Ya ce al’ummar jihar Katsina sun fara ganin tasirin ayyukan raya ƙasa da gwamnatinsa ke aiwatarwa a sassa daban-daban na jihar.
Radda ya bayyana cewa a zaɓen 2027, abin da gwamnatinsa za ta gabatar wa al’umma shi ne abin da ta riga ta cimma, maimakon yin wasu sabbin alkawura.
“A zaɓe na gaba, za mu nuna wa jama’a abin da muka yi, ba za mu yi sabbin alkawura ba,” in ji Gwamna Radda.
Ya kuma yi iƙirarin cewa dukkanin mazabu 361 na jihar Katsina sun samu wani aiki ko shiri daga gwamnatinsa tun bayan da ta karɓi mulki.
Gwamnan ya buƙaci sabbin shugabannin APC Zalla Movement da su ƙara ƙaimi wajen isar da bayanan manufofi da shirye-shiryen gwamnati zuwa ga al’ummomin ƙauyuka da birane.
Ya kuma sanar da cewa gwamnatinsa za ta samar da motoci ga rassan ƙungiyar guda uku na shiyya domin taimaka musu wajen gudanar da ayyukan wayar da kai da kuma ƙarfafa tsarin jam’iyyar a matakin ƙasa.
Gwamna Radda ya kuma yi kira ga shugabannin APC da magoya bayanta da su kasance masu haɗin kai wajen kare wa’adin da al’umma ta bai wa jam’iyyar, yana mai cewa gwamnatinsa za ta ci gaba da samar da ayyukan ci gaba.
Taron ya kuma kasance wata dama ta karrama marigayi Dr Bala Nuhu Kankia, wanda Radda ya bayyana a matsayin ɗan jam’iyya mai biyayya kuma wanda ya taka muhimmiyar rawa wajen kafa APC Zalla Movement.
Radda ya ce faɗaɗa ayyukan ƙungiyar zuwa ƙananan hukumomi da mazabu zai taimaka wajen ƙara ƙarfafa tushen APC a faɗin jihar, musamman yayin da ake tunkarar babban zaɓen 2027.
