Home Labarai “Sadakatu-Jariya ce hanyar ruwan da na gina wa al’ummar Katsina” – Mai...

“Sadakatu-Jariya ce hanyar ruwan da na gina wa al’ummar Katsina” – Mai Turaka

42
0

Mai taimaka wa gwamna Masari akan wayar da kan jama’a akan abin da ya shafi gwamnatinsa Hon. Abdu;’aziz Mai Turaka ya mika hanyar ruwa (Kwata) da ya gina wa al’ummar Daki-tara ga dattawan unguwar domin cigaba da kula da ita don a samu bukatar da ake nema.

Da ya ke jawabin a wajen bikin mika wannan babban aikin Hon. Mai Turaka ya bayyana cewa wannan aiki ya yi shi ne sakamakon maganar da mahaifiyarsa ta yi masa saboda rokon da mutanen unguwa suka yi mata na a taimaka a yi wannan aiki.

“Babu shakka wannan aiki na yi shi da niyyar Allah ya kai ladar zuwa ga mahaifiyata, ke nan ya zama sadakatu jariya, duk da cewa tana nan da ranta, amma ina son Allah ya kai ladar wannan aiki gareta” inji Mai Turaka.

Dangane da batun cewa gwamnati ce ta yi wannan aikin hanyar ruwa kuwa, Abdul’aziz ya ce babu wata gwamnati ko wani mutum a cikin wannan aiki, shi ne da kansa ya yi ba tare da neman gudunmawar kowa ba kuma babu wanda ya bada wata gudunmawa domin yin wannan aiki.

Mai Turaka ya yi bayanin cewa wannan abun da aka ga ya yi to koyi ne bisa koyi da ya ke daga mai girman gwamnan Katsina Aminu Bello Masari saboda a cewarsa Masari yana amfani da kudin aljihunsa wajen yin abin da zai taimaka wa al’umma.

“Muna gani gwamna Masari yana gina Masallatai da Islamiyoyi da kuma aikin hanyar ruwa irin wannan da kudin aljihunsa ba sai ya yi amfani da kudin gwamnati ba, saboda haka wannan abun da muke yi koyi da shi” inji Mai Turaka.

Haka kuma ya yi addu’ar Allah ya kara zaunar da unguwar Daki-tara lafiya, sannan ya yi kira ga dattawan da ya hannata wannan aikin gare su da su tabbatar da tsaftar wannan hanyar ruwa domin amfanin kansu da kansu.

Daga karshe ya yi alkawarin sanya fiyib din ruwa da zai ratsa wannan unguwa domin amfanin mutane sannan ya kara da cewa zai sa a gina rijiyar burtsatse da zata taimaka idan ba a mai dao ruwa a cikin unguwar.

Shi ma da ya ke nasa jawabin a madadin mutanen unguwar daki tara, Alhaji Hussain Batsari ya yaba da wannan korari na S.A Mai Turaka wanda ya samar da wannan hanyar ruwa da ta yi shekara da shekaru ana neman wanda zai yi ta, sai yanzu.
Ya kuma bada tabbacin cewa a madadin mutanen unguwa za su kula da tsaftar wannan unguwa ta hanyar kwashe duk wata leda ko kazanta da zata toshe hanyar ruwa a cikin wannan kwata.
Ya kuma yi addu’ar Allah Ya kai ladar wannan aiki ga Hajiya Mahaifiyar Mai Turaka sannan ya roki Allah yasa Mai Turaka ya gama da Hajiya lafiya, ya kuma yi kira ga sauran jama’a da su yi koyi da shi wajan samar da ire-iren wadannan ayyuka na alheri a cikin al’umma.

Ziyarci shafin Facebook na DCL Hausa
Ziyarci shafin Facebook na DCL Hausa
 

Leave a Reply