Wata babbar kotun tarayya da ke Abuja ta yi watsi da ƙarar da wasu jami’an ma’aikatar Ilimi mai zurfi ta jihar Kano suka shigar, inda suka nemi hana Hukumar ICPC bincike kan zargin amfani da kuɗaɗen tallafin karatu ba bisa ka’ida ba.
Mai shari’a J. Obanor ya ce gayyatar da ICPC ta yi na neman takardu ba take hakkin kowa ba, ya kuma tabbatar da ikon hukumar na ci gaba da gudanar da binciken da take gudanarwa a hukumar.
A yayin binciken, ICPC ta gayyaci jami’an Ma’aikatar Ilimi Mai Zurfi ta Kano da Hukumar Tallafin Karatu ta jihar domin gabatar da takardu da kuma yi wa hukumar bayani.
Sai dai maimakon amsa gayyatar, jami’an a karkashin Dr. Hadi Bala, babban sakatare na ma’aikatar, ya jagoranta, suka shigar da ƙara mai lamba CV/2857/2025 kan babban lauyan ƙasa da ICPC, suna ikrarin irin waɗannan gayyatar cewa tauye musu ’yanci ne, lamarin da kotun ta musanta.
