Tsohon Gwamnan Kano, Dakta Abdullahi Umar Ganduje, ya maida martani kan kiran da gwamnatin Kano ta yi na a kama shi, yana cewa wannan zargi na kafa wata rundunar ba shi da tushe balle makama.
A wata sanarwa da mai magana da yawunsa, Edwin Olofu, ya fitar, Ganduje ya ce gwamnatin Abba Kabir Yusuf ta nuna gazawa ta hanyar karkatar da hankali daga matsanancin matsalar tsaron da ke addabar jihar.
Sanarwar ta zargi Gwamna Abba da kasa zuwa ko nuna tausayawa ga al’ummomin da ke fama da hare-hare, musamman mazauna Bagwai, Shanono, Tsanyawa da sauran wurare da ke cikin fargaba. Ganduje ya ce maimakon daukar matakin kare rayuka da dukiyoyin jama’a, gwamnatin ta dauki hanyar jifa da zargi marasa tushe.
Hakazalika, sanarwar ta kuma bayyana cewa Ganduje ba ya da alaka da tashin hankali wata dabi’a da ke barazana ga zaman lafiyar Kano, sannan ta jaddada cewa a tsawon mulkinsa na shekaru takwas jihar ta zauna cikin kwanciyar hankali.
Ganduje ya bukaci Gwamna Abba da ya maida hankali kan aiki da kundin tsarin mulki ya dora masa na kare mutanen Kano, maimakon yin abin da ya kira “wasan siyasa da wallafa zarge-zarge marasa amfani” don kau da hankali daga gazawar gwamnati.
