Hukumar NYSC ta karyata zargin tsawaita wa wata ‘yar bautar ƙasa daga Legas, Rita Uguamaye (Raye), aikin watanni biyu saboda sukar gwamnatin Shugaba Bola Tinubu.
Raye ta shahara a kafafen sada zumunta bayan ta wallafa bidiyo a TikTok tana koka da tsadar rayuwa da hauhawar farashi, tare da sukar Tinubu da kiran sa “shugaba mara tausayi.”
Daga baya, Raye ta ce ana yi mata barazana daga jami’an NYSC saboda bidiyon, inda ta ƙi goge shi tana mai cewa ta faɗi gaskiya ne.
Jaridar Punch ta ruwaito cewa biyo bayan zargin da Raye ta yi, mutane da dama ciki har da tsohon mataimakin shugaban ƙasa Atiku Abubakar da ɗan gwagwarmayar kare haƙƙin ɗan adam, Omoyele Sowore, sun yi Allah-wadai da barazanar da aka ce ana yi mata.
