Tsofaffin ma’aikata a jihar Sokoto sun bayyana takaici kan yadda aka yi watsi da su, tare da bukatar gwamnatin jihar ta dauki matakin gaggawa wajen magance halin kunci da suke ciki.
Da yake zantawa da jaridar Punch, Sakataren kungiyar tsofaffin ma’aikatan gwamnati ta jihar Sokoto, Malam Muhammad Garba, ya bayyana cewa tsarin fansho a jihar ya tsaya cak fiye da shekaru ashirin, lamarin da ya jefa dubban tsofaffin ma’aikata cikin talauci duk da tanadin kundin tsarin mulki da ke bukatar karin fansho lokaci-lokaci.
Ya kara da cewa karo na karshe da aka yi karin fansho tun a zamanin gwamnatin Bafarawa ne, inda aka kara kudin fansho zuwa Naira 4,000.
A cewarsa, tsarin fansho na jihar bai sauya ba duk da karin mafi karancin albashi na Naira 18,000, da Naira 30,000, da kuma sabon karin Naira 70,000 da aka aiwatar.
Har yanzu akwai masu karbar Naira dubu 4000 a matsayin kudin fansho a Sokoto – Kungiyar tsoffin ma’aikata
-
