Matatar mai ta Dangote ta bayyana cewa yajin aikin da kungiyar ma’aikatan NUPENG ta fara ba zai haddasa karancin mai a fadin Nijeriya ba.
Mai magana da yawun kamfanin Anthony Chiejina, ya shaida wa kamfanin dillacin labarai na AFP a ranar Talata cewa duk da yajin aikin da aka fara a ranar Litinin, kamfanin na ci gaba da rarraba man fetur yadda ya kamata, kuma ana ci gaba da tattaunawa tsakanin gwamnati, kungiyar ma’aikatan da kamfanin.
Ya ce kafin matatar ta fara aiki, Nijeriya tana shigo da mafi yawan man fetur din ta duk da kasancewarta babbar mai fitar da danyen mai, amma bude matatar Dangote, wadda take sarrafa ganga dubu 650 a rana, ya kawo sauki ga farashin mai tare da jawo canje-canje a kasuwar man fetur ta cikin gida.
Kungiyar NUPENG ta shiga yajin aiki ne bisa zargin cewa ana daukar sabbin direbobin kamfanin ne da sharadin kada su shiga kungiyoyin kwadago, abin da kamfanin ya musanta.
