Mataimakin Shugaban Nijeriya, Kashim Shettima, ya bayyana cewa Hukumar yaki da cin hanci da rashawa (EFCC) ta karbo kadarori da kudade da darajarsu ta haura Naira biliyan 500.
Shettima ya bayyana hakan ne a ranar Litinin yayin bude taron horaswa na kwanaki uku ga alkalai da manyan masana shari’a, wanda EFCC tare da Cibiyar Shari’a ta Ƙasa (NJI) suka shirya a Abuja.
Gidan talabijin na Channels ya ruwaito ya ce, wannan ci gaba ya samu ne saboda Gwamnatin Shugaba Bola Tinubu ba ta tsoma baki cikin ayyukan hukumar, abin da ya taimaka mata wajen samun nasara a yaki da rashawa.
Mataimakin Shugaban Ƙasar ya ƙara da cewa EFCC ta samu hukuncin laifuka guda 700 cikin shekaru biyu da wannan gwamnati ke mulki.
Shettima ya bayyana cewa kudaden da aka karbo daga hannun masu laifi ana amfani da su wajen aikin ci gaban ƙasa a sassa daban-daban na tattalin arziki.
