Shugaban hukumar hana sha da fataucin miyagun kwayoyi ta kasa NDLEA, Birgediya Janar Buba Marwa (mai ritaya), ya bayyana damuwa matuƙa game da yadda mafi yawan jihohin Najeriya suka kasa kafa ko amfani da kwamitin yaki da miyagun kwayoyi a matakin jihohi.
A cewar Marwa, wannan na daga cikin manyan cikas da ke hana ci gaba wajen yaki da amfani da kwayoyi a faɗin ƙasar nan.
Yayin wani taron horaswa da hukumar NDLEA ta shirya a Abuja ga matan gwamnoni na Najeriya karkashin kungiyar Nigeria Governors’ Spouses Forum, Marwa ya bayyana cewa jihohi tara ne kacal daga cikin 36 da ke da ingantattun kwamitoci masu aiki wajen rage buƙatar amfani da kwayoyi.
Birgediya Marwa ya kuma bayyana bukatar fara gwajin miyagun kwayoyi ga ma’aurata kafin aure, yana mai cewa yawaitar shan kwayoyi na da nasaba da tashin hankali a gidaje.
