Babban Bankin Najeriya (CBN) ya bayyana cewa darajar Naira ta kara faduwa a kasuwar canji ta hukuma, inda ta rufe a kan N1,602.18 kan kowacce dala a ranar Juma’a, 2 ga Mayu, 2025. Wannan na nufin a samu faduwar Naira da N5.49 ko kuma kashi 0.34 cikin 100 idan aka kwatanta da farashin da ta tsaya a kai a ranar Laraba, 30 ga Afrilu, na N1,596.69.
Masana sun danganta wannan faduwar da hauhawar bukatar kudin waje da kuma karancin isar sa daga hannun gwamnati da masu zuba jari. A cewar bayanan kasuwar canji, farashin canjin Naira ya tsaya tsakanin N1,599.95 da N1,596.69 daga ranar Litinin zuwa Laraba kan dalar Amurka daya.
A kasuwar bayan fage (black market), Naira ta dan samu karuwa, inda ta tashi daga N1,608 zuwa N1,605 kan kowacce dala a ranar Juma’a.
Wannan ci gaba na nuna cewa, duk da kokarin da CBN ke yi na daidaita kasuwar canji, har yanzu ana fuskantar kalubale wajen daidaita darajar Naira a kasuwannin canji na cikin gida da na waje.
