Ƙungiyar manyan ma’aikatan wutar lantarki da ma’aikatan kamfanin rarraba hasken wutar lantarki na KEDCO sun tsunduma yajin aikin sai baba ta gani.

Yajin aikin da suka faro shi a ranar Laraba 21 ga watan Janairun 2026, ya biyo bayan zargin da suka yi na rashin kyakkyawan tsarin aiki, baya ga rashin biya musu bukatunsu cikin wa’adin da suka diba.

Yajin aikin ya yi sanadiyyar jefa wasu yankuna a jihar Kano cikin duhun rashin lantarki, kamar yadda rahotanni suka tabbatar.

Jaridar Punch ta ambato wasu daga cikin jagororin ma’aikatan na jaddada bukatunsu na inganta yanayin aiki, da kuma biyan su tarin basuka da suke bi tun daga shekarar 2014.

Kotun tarayya da ke Abuja ta bayar da beli na Kwamishinan kuɗi na jihar Bauchi, Yakubu Adamu, da sauran wadanda ake tuhuma tare da shi, kan zargin tallafa wa ta’addanci da kudi dala miliyan 9.7.

Gidan talajibin TVC ya rawaito Mai shari’a Muhammad Umar ya amince da bukatar bayarda belin a Larabar nan, 21 ga Janairu, 2026, inda ya gindaya sharuddan da dole wadanda ake tuhuma su cika kafin su fita.

Kotu ta umurci kowane daga cikin wadanda ake tuhuma da ya gabatar da masu tsaya masa biyu, wadanda dole ne su kasance Babban Sakataren Ma’aikatar gwamnatin tarayya ko kuma matsayin Darakta a aikin gwamnati.

Haka kuma, an umurce su da su mika fasfo dinsu na kasa da kasa ga rajistaran kotu.

Rundunar ‘yan sandan Nijeriya ta tabbatar da cewa an sace fiye da Kiristoci 100 daga Coci uku a jihar Kaduna, bayan da a baya ta musanta faruwar lamarin.

DW Afrika ta rawaito cewa lamarin ya faru ne a ranar Lahadi a yankin Kurmin Wali, inda mazauna yankin suka ce adadin wadanda aka sace ya kai 177, sai dai mutane 11 sun samu damar tserewa daga hannun masu garkuwa da mutanen.

A cewar rundunar ‘yan sanda, musantawar da ta yi tun da farko ta faru ne sakamakon rashin samun bayanai, inda binciken da aka gudanar daga baya ya tabbatar da cewa an yi garkuwa da masu ibadar.

Bankin Duniya ya zai bayar da rancen dala miliyan 12 ga wasu jihohin Nijeriya da ke da sansanonin ‘yan gudun hijira, domin inganta tattara bayanai da cike gibin bayanan da suka shafi matsalolin gudun hijira.

Gidan talabijin na Channels ya rawaito cewa, an amince da bayar da kudin ne a karkashin wani sabon shiri wanda Bankin Duniya ya amince da shi a ranar 7 ga Agusta, 2025.

Rahoton ya bayyana cewa, kudin na daga cikin rancen dala miliyan 300 da International Development Association (IDA) ta amince da shi, wanda aka sanya hannu tsakanin Gwamnatin Nijeriya da Bankin Duniya,amma jihohi za su samu kudin ne kawai idan sun cika sharuɗɗan da aka shimfiɗa.