Gwamnatin tarayya ta bayyana shirin samar da wutar lantarki a kalla megawatt 8,000 a karshen wa’adin mulkin shugaba Bola Ahmed Tinubu na farko a shekarar 2027.
Ministan wutar lantarki, Adebayo Adelabu, ne ya bayyana hakan a ranar Alhamis a yayin taron manema labarai karo na shida a 2025 a Abuja.
Adelabu ya ce abin da aka sa a gaba ya tabbata, yana mai cewa tuni fannin samar da wutar lantarki ya samu ci gaba da kashi 40 cikin 100 tun bayan hawan gwamnatin shugaba Bola Ahmad Tinubu.
Ministan ya ce ya bibiyi tarihin yadda ake samar da wutar lantarki a Nijeriya, inda ya bayyana cewa an dauki kusan shekaru 40 – daga 1984 zuwa 2022 – ana samun megawatt 2,000 zuwa 4,000 amma nan da karshen wa’adin mulkinsu za a samu megawatt 8000.
