Hukumar SON mai kula da ingancin kaya a Nijeriya ta ja hankalin cewa akwai tayoyi da wayoyin lantarki marasa inganci da ke yawo cikin kasar.
Babban daraktan hukumar Dr Ifeanyi Chukwunonso Okeke ne ya bayyana damuwarsa da wannan lamari a lokacin da ya jagoranci lalata wasu tayoyi da wayoyin lantarki da wasu kayayyaki marasa inganci da kimarsu ta kai ta bilyoyin Naira a jihar Legas, kamar yadda jaridar Daily Trust ta rawaito.
Ya koka kan yadda ake samun karuwar kaya marasa inganci da kuma na jabu a manyan kasuwannin da ke fadin kasar, tare da zargin wasu da ya kira masu zagon kasa ga tattalin arzikin kasa da daukar alhakin shigo da su.
