By Salim Muhammad Gali
Rundunar ’yan sandan Nijeriya ta tsawaita wa’adin fara tilasta yin lasisin gilashin mota mai duhu wato tinted glass permit zuwa 12 ga Agusta, 2025.
Babban Sufeto Janar, Kayode Egbetokun, ya bayyana haka a wata sanarwa da jami’in hulda da jama’a na rundunar, Olumuyiwa Adejobi, ya fitar.
A cewarsa, an ɗauki wannan matakin ne bayan samun korafe-korafe daga jama’a dake neman sauƙaƙa tsarin neman lasisin.
Rundunar ta ce za a inganta tsarin ta hanyar neman lasisin ta intanet domin rage tsaikon da ake samu.
Haka kuma, an bukaci ’yan Najeriya da su yi amfani da shafin wajen nema ko sabunta lasisin tare da kai rahoton duk wata matsala da suka fuskanta.
