Shugaban Nijeriya Bola Ahmad Tinubu ya jinjina wa maza da mata na rundunar sojojin Nijeriya bisa jajircewa da sadaukarwar da suke yi don kare ƙasar daga barazanar tsaro.

Gidan talabijin na Channels ya rawaito cewa, Tinubu ya bayyana hakan ne a taron ƙungiyar Editocin Nijeriya NGE da aka gudanar a Abuja a ranar Laraba, inda ya ce sojojin suna fuskantar haɗari domin kare mutuncin kasar.

Shugaban ya ce duk da ƙalubalen da ake fuskanta na ta’addanci da ‘yan bindiga, gwamnatinsa tana ɗaukar matakai don karfafa rundunar sojoji da sauran jami’an tsaro.

A cewar sa, ya zama wajibi a ci gaba da kare su da kuma ba su goyon baya duba da irin hadarin da suke fuskanta.

Gwamnatin Nijeriya ta ce tana kan hanyar ninka tattalin arzikinta bisa ma’aunin GDP zuwa shekara ta 2037, bisa hadin gwiwar da ke tsakanin ma’aikatar kudi da babban bankin Nijeriya (CBN).

Karamar ministar kudi, Doris Uzoka-Anite ce ta bayyana haka a ranar Talata a Abuja yayin da take gabatar da jawabi a taron shekara-shekara na manyan jami’an babban bankin Nijeriya.

Ta ce samun hadin kai tsakanin bangarorin da suka shafi kudi na da matukar muhimmanci wajen tabbatar da ci gaban tattalin arzikin kasar.

A cewarta, burin gwamnati shi ne ta cimma karuwar GDP sama da kashi 4% a kowace shekara zuwa 2027, wanda hakan zai ninka darajar tattalin arzikin Nijeriya zuwa 2037 idan aka ci gaba da samun karuwar da ta kai kashi 7% a duk shekara.

Jam’iyyar adawa ta PDP a Nijeriya ta bayyana cewa ba za ta janye shirinta na gudanar da taron zaben shugabanninta na kasa da aka tsara a ranar 15 da 16 ga Nuwamba ba, duk da sabon umarnin kotun tarayya na hana yin taron.

Mataimakin mai magana da yawun jam’iyyar, Ibrahim Abdullahi, ya shaida wa Daily Trust cewa sabon hukuncin kotu bata lokaci ne kawai, yana mai cewa jam’iyyar na bin umarnin kotun koli wanda ya tabbatar da cewa jam’iyyu na da ikon gudanar da harkokinsu na cikin gida ba tare da tsoma bakin kotu ba.

Abdullahi ya ce PDP ba za ta lamunci abin da ya kira hukuncin da wasu suka tsara ba, yana mai jaddada cewa jam’iyyar ta samu kafuwa daga ‘yan Nijeriya ne ba daga kotu ba.

A ranar Talata da ta gabata mai shari’a Peter Lifu na kotun tarayya da ke Abuja ya bayar da umarnin hana PDP gudanar da taron a Ibadan, tare da umartar INEC da kada ta sa ido ko ta amince da sakamakon taron, wanda ya biyo bayan karar da tsohon gwamnan Jigawa kuma dan takarar shugabancin jam’iyyar, Sule Lamido, ya shigar yana kalubalantar tsarin sayar da fom din takara.