Shugaban Najeriya Bola Tinubu yana kan hankalin ƙungiyar kwadago NLC ta yi la’akari da yanayin ƙarfin gwamnati wurin neman mafi ƙarancin albashi.

Tinubu ya ce ya san muhimmancin faranta wa ma’aikata kuma ya san yanayi da suke ciki, amma kuma ya kamata ana sara ana duba bakin Gatari.

Shugaban na Najeriya a wata ganawa da shugabannin kungiyar ta NLC Alhamisɗinnan ya ce gwamnatin sa dau kyautatawa ma’aikata abu mai muhimmanci saboda al’umma baki daya tana amfana da aikin su da ya gudana cikin farin walwala.

A jawaban su yayin ganawar da shugaban kasa shugaban kungiyar kwadago Joe Ajaero ya nuna wa shugaban kasa Tinubu muhimmancin a kara sosai kan abin da ya ke a yanzu, a matsayin mafi ƙarancin albashi, saboda rayuwar tsada da ma’aikata ke fama da ita.

Tsohon mataimakin shugaban Najeriya Atiku Abubakar kuma madagun adawa a Kasar ya yaba hukuncin kotun koli da ya baiwa kananan hukumomin ƙasar ikon sarrafa kuɗaɗen su ba tare da an hada su da gwamnoni ba.

Atiku, a shafin sa na twitter, ya ce wannan mataki na kotun ƙoli nasara ce ga yan Najeriya kuma abin a yaba ne matuka saboda ya kawar da mummunan tsarin nan da gwamnatocin jihohi ke amfani da shi suna sakaye kuɗaɗen ƙananan hukumomi a asusun gwamnatin jiha.

Madugun adawan na Najeriya yayi fatan yancin na kananan hukumomi zai zarta ɓangaren kudi kadai, yana bayar da shawarar a raba su da jihohi kuma wurin karbar Barack da tara shi saboda yadda ya ce gwamnatocin jihohi ke yin yadda suka ga dama da kuɗin haraji na kananan hukumomi.

Farashin masara dai na ci gaba da cin karensa babu babbaka a sassan kasuwannin kasar Najeriya musamman a jihar Legos da ke kudancin kasar, inda a makon nan ake sai da buhunta a kan kudi N108,000, an samu karin N3000 kenan kan farashin makon da ya gabata da aka sai da N105,000 a kasuwar Mile 12 International Market Lagos.

Wata babbar kotu a Abuja ta tura tsohon ministan wutar lantarki Sale Mamman gidan Yãri da ke Kuje kafin a duba yiyuwar bada belin shi, kan zargin da ake masa na almundahana da kuɗin ƙasa, zargin da shi kuma ya musanta.

Hukumar EFCC ta yi ƙarar tsohon ministan tana buƙatar kotu ta bincike shi kan salwantar wasu kuɗaɗen da suka kai sama da Naira biliyan 30.

Lauyan tsohon ministan Femi Ate ya fadawa alkali James Omotosho cewa ya nemi belin wanda ya ke karewa, saidai alkalin ya ce a lokacin wannan zama na sauraron ƙarar bai kai ga samun wannan bukata ba.

Ministan harkokin noma na Najeriya Abubakar Kyari yana albashir ga ‘yan Najeriya kan batun karya farashin kayan abinci da gwamnatin shugaba Tinubu ta daura ɗamarar yi a watan Junairu da ke tafe.

Ministan ya ce matakin cire haraji kan wasu kayayyakin abinci ga gwamnatin shugaba Tinubu ta amince wa yan kasuwa shigo da su Najeriya da kuma ƙoƙarin gwamnati na shigo da tan dubu 500 na Alkama da Masara su ne manyan dalilan gwamnati na karya farashin a watan ɗaya na shekara mai zuwa, kuma ya ce gwamnati zata ƙaiyade farashi da za’a riƙa sayar da kayan na abinci.

Kyari ya ce sun samu kwarin gwiwar yin hakanne bayan shawara da ƙungiyar manoman Najeriya ta basu cewa yin hakan ne kadai zai sa a samu saukin rayuwa, saboda a cewar ƙungiyar manoman ta AFAN abinci da ake nomawa ba zai isa ba.

Wannan mataki na gwamnatin tarayya na zuwa shekara guda bayan cire tallafin man fetur, abin da wasu ke ganin kamar ya zo a makare, sannan ina ma ace a wannan lokaci na damuna za’a aiwatar ba wai har nan da kwanaki 180 ba.

Kotun ƙoli a Najeriya ta kawo ƙarshen alakar gwamnonin ƙasar da kuɗaɗen ƙananan hukumomi.

A wani zama na yanke hukunci ta kotun ta yi Alhamisɗinnan ƙarkashin jãgorancin mai Shari’a Emmanuel Agim ta ce daga yanzu kowace ƙaramar hukuma a ƙananan hukumomin Nigeria 774 ce kadai ke da hurumin sarrafa kuɗaɗen ta.

Kotun ƙolin ta Najeriya ta ce dama dai tsarin mulkin ƙasar matakai uku na gwamnati ya sani wato gwamnatin taraiya, gwamnatocin jihohi da na ƙananan hukumomi kuma daga yanzu gwamnoni bazasu sake nada kantomomi  ƙananan hukumomi ba saboda a cewar kotun gwamnoni suna nada wadan da zasu iya cire su ne kaɗai.

Gwamnonin na Najeriya dai dama sun kulibalanci hurumin kotun na yin Shari’a kan wannan batu, amma a hukuncin da ta yanke kotun ta ce ministan shari’a yana da hurumin shigar da ƙara a gaban ta dan kare kundin tsarin mulkin ƙasar.

Shugaban jam’iyyar APC na kasa, Dr Abdullahi Umar Ganduje, da mai dakinsa, da wasu mutane shida na shirin gurfana a gaban wata babbar kotu a jihar Kano ranar Alhamis mai zuwa.

Suna fuskantar tuhume-tuhume da suka shafi cin hanci da rashawa da karkatar da ƙuden kudade da suka kai biliyoyin Naira.

Gwamnatin jihar Kano ce ta shigar da karar a gaban mai shari’a Amina Adamu Aliyu.