MTN ya kulle layuka 4.2m da aka kasa hada su da lambar NIN

Kamfanin sadarwa na MTN a Nijeriya ya ce ya katse layukan sadarwa akalla miliyan 4.2 daga cibiyar sadarwarsa yayin da wa’adin da aka kayyade na ranar 28 ga watan Fabrairu na a hada lambobin layuka da shaidar zama dan kasa (NIN) da SIM ya cika.

Kamfanin MTN ya bayyana hakan ne a sakamakon binciken da ya gudanar a ranar Juma’a.

Kamfanin ya ce layukan da aka katse sune na mutanen da suka yi kunnen kashi suka ki hada shi da lambar shaidar zama dan kasa wato NIN.  

A cewar kamfanin, tun a cikin watan Disambar  2023 ne hukumar NCC ta ba da umurni ga dukkanin kamfanonin sadarwa a  kasar da su tabbatar masu masu amfani da layukan sadarwa su hada layukan wayoyinsu da NIN ɗin su.

 Muna ba da shawara ga Gwamnatin Kano da nemi afuwar Daurawa – Abdallah Gadon Kaya 

Fitaccen malamin addinin Musulunci daga jihar Kano Dr. Abdallah Usman Gadon Kaya ya yi kira tare da bayar da shawara ga gwamnan jihar, Abba Kabir Yusuf da ya nemi afuwar Sheikh Aminu Daurawa.

Dakta Gadon Kaya ya yi kiran ne a wani bidiyo da ya wallafa a shafinsa na sada zumunta na facebook a ranar Juma’a jim kadan bayan Sheikh Daurawa ya ayyana yin murabus daga shugabancin hukumar Hisbah.

Ya ce “Muna kira ga gwamna Abba Yusuf tare da makusantansa da su kai zuciya nesa su kira malam Daurawa, su zauna da shi kuma su ba shi haƙuri kan abubuwan da ya faru.”

 Tinubu ya umurci BUA/Dangote su dawo da tsohon farashin siminti 

Shugaban kasa Bola Ahmed Tinubu ya umurci kamfanonin siminti da su koma yadda suke a halin da ake ciki dangane da farashin kayayyaki.

Ministan ayyuka Sanata David Umahi ne ya bayyana hakan ga manema labarai jim kadan bayan ya ziyarci masana’antar siminti na BUA da ke Sokoto ranar Alhamis.

A cewarsa shugaban ya umurci masana’antun su koma kan tsohon farashin siminti yadda yake a baya.

 Ba ku isa ku yi fada da ni ba, martanin Tinubu ga kungiyar NLC

Shugaban Nijeriya Bola Tinubu ya yi Allah wadai da zanga-zangar adawa da tsadar rayuwa da kungiyar kwadago ta Nijeriya NLC ta yi a cikin makon nan. 

Shugaba Tinubu ya gargadi ‘yan kungiyar ta kwadago da su sani cewa ba NLC kadai ce muryar jama’a ba.

Ya yi magana ne a yayin kaddamar da layin dogo na jirgin kasa na Red Line a jihar Legas wanda ya hada daga Agbado zuwa Oyingbo.

 Yan sanda sun kama masu sana’ar awo da ke algus a Gombe 

Rundunar ‘yan sandan jihar Gombe a ranar Alhamis ta tabbatar da cafke wasu mutane biyu Bashir Haruna da Mohammed Isah.

 A cewar wata sanarwa da mataimakin jami’in hulda da jama’a na jihar, ASP Sharif Sa’ad ya rabawa manema labarai, an kama wadanda ake zargin ne da laifin hada baki wajen gauraya abinci da ya lalace da mai kyau.

Sa’ad ya ce an kama wadanda ake zargin ne yayin da aka ji labarin cewa sun yi algus a buhunan shinkafa 57 inda za su je su sayar wa jama’a da ba su ji ba gani.

Ya ce, “Rundunar ‘yan sandan jihar Gombe a karkashin jagorancin CP Hayatu Usman na son sanar da jama’a game da kama yan kasuwar da ake zargi da laifin yin algus da ma fasa-kwaurin abinci, musamman shinkafa.

 Na dauki laifin tsanani da tsadar rayuwa da ‘yan kasa ke ciki – Tinubu

Shugaba Bola Tinubu ya roki ‘yan Nijeriya da su yi hakuri su kuma ci gaba da juriya dangane da halin da matsin da tattalin arzikin kasar ke ciki, inda ya ba da tabbacin cewa akwai haske nan gaba kadan.

Shugaban ya ce yana da cikakkiyar masaniya kuma ya dauki alhakin matsalolin da ‘yan Nijeriya ke fuskanta saboda manufofin gwamnati.

Ya ce ba zai yi korafi ba amma yana maraba da duk sukar da ake yi masa tunda shi ne ya nemi zama shugaban Nijeriya.

Shugaban ya yi wannan jawabi ne a Akure, babban birnin jihar Ondo, a ziyarar da ya kai wa shugaban kungiyar kabilar Yarabawa ta Afenifere a ranar Laraba.

 Kungiyoyin matasa a a jihar Ogun sun bukaci shugaba Tinubu ya bude boda

Gamayyar kungiyoyin matasan jihar Ogun sun yi kira ga shugaban kasa Bola Tinubu da ya bude dukkanin iyakokin kasa a wani mataki na magance matsalar tsadar abinci da yadda za a kara habaka tattalin arziki da kasar.

Kakakin kungiyar, Fẹmi Owoẹye, wanda ya yi wa manema labarai jawabi a Abeokuta, ya roki Tinubu da ya tashi tsaye wajen shawo kan matsalar ta hanyar bude iyakokin kasa domin bunkasa tattalin arziki da rage tsadar kayan abinci.

Matasan sun kuma nuna damuwarsu kan cewa duk matakan da gwamnati kasar ta bijiro don magance wahalhalun da ake fama da su ba su shafi matasan Nijeriya ba, musamman ma wadanda ba su da aikin yi.

 Da Dumi-Dumi: Gwamnatin Kano ta dakatar da nadin Hakimi a Bichi

Gwamnatin jihar Kano ta umurci majalisar masarautar Bichi da ta dakatar da bikin nadin sarautar Salisu Ado Bayero a matsayin hakimin masarautar.

Jaridar Daily trust ta ruwaito cewa gwamnatin ta dakatar da nadin na Salisu Ado Bayero wanda kane ne ga Sarkin Bichi Nasiru Ado Bayero.

A ranar 15 ga watan Fabrairu ne Masarautar Bichi ta rubutawa Salisu Ado Bayero wasika inda ta sanar da shi amincewar sarkin na a nada shi a matsayin hakimin gundumar Bichi.