Dikko Umar Raɗɗa

Mataimakin Gwamnan jihar Katsina Alhaji Faruq Lawan Jobe, ya ce gwamnatin jiha ta yi kokari ta maido da zaman lafiya a kananan hukumomi 13 cikin 22 da ke fama da matsalar tsaro a jihar.

Jaridar This day ta rawaito cewa Faruq Jobe na magana ne a gaban ‘yan jarida, inda ya ce an samu wannan nasarar ne ta dalilin ayyukan jami’an sa kai na ‘Community Watch Corp’ da gwamnatin ta kirkiro, hadin guiwa da sauran jami’an tsaro a jihar.

Daga cikin kananan hukumomin da tsaron ya fara inganta, a ta bakin mataimakin Gwamnan jihar, akwai Batagarawa, Dutsinma, Bindawa, Kusada, Funtua, Danja, Bakori, Malumfashi, Kafur, Musawa, Ingawa, Charanci da Matazu.

Kola Sulaimon / AFP

ECOWAS da shugabanninta sun lashe amansu bayan da a taron kungiyar
a Abuja, ta janye wasu daga cikin takunkuman da ita da kanta ta lafta wa Nijar
don ladabtar da sojojin da suka hambarar da gwamnatin dimukuradiyya a shekrar
da ta gabata. A sanarwar da ECOWAS din ta fitar ta ce a hankali za ta janye
sauran, amma ta ce ta janye wa kasashen Mali da Guinea takunkuman kudi da
tattalin arziki. Sai dai ‘yan Nijar sun fi damuwa da bukatar a janye musu
takunkuman iyakoki da kudade da na wutar lantarki wanda kawo yanzu sanarwar ta
ECOWAS ba ta ce komai a kai ba. 

Tun bayan lafta wannan takunkumi dai, hukumomin mulkin sojan kasar
suka dukufa wajen lalubu hanyoyin rage radadin takunkumin amma kusan ba su yi
wani tasiri ba duba da yadda farashin kayayyakin musamman abinci ya ki sauka
tare da ci gaba da fuskantar matsalar rashin wadatuwar kudade a hannun mutane.

To sai dai duk da wannan yanayi da aka shiga sojojin suka ci gaba
da kafewa kai da fata ak an matsayin su har ma a karshe suka ayyana ficewarsu
tare da takwarorinsu na Mali da Burkina Faso daga cikin kungiyar baki
daya  don haka ne ga masu fashin baki irinsu Dr Gambo Alhaji Sani masanin
kimiyar siyasa a Jami’ar André Salifou ta Damagaram ke ganin dole ne kungiyar
ta ECOWAS ta rungumi kaddara domin kuwa ta ga ba wurin zuwa ne sai gona shi ya
sa ta ci tuwon fashin, mai sharhin ya shaida wa DCL Hausa cewa duk da ECOWAS ta
janye takunkuman amma zai wahala idan yanzu sojojin na Nijar za su janye fita
daga kungiyar da suka yi domin sun yanka sun ga jinni

Tun farkon wannan mako mai karewa ne dai rahotanni cire takunkumin
na ECOWAS kan Nijar ke yawo kafin a tsakiyar makon tsohon shugaban kasar
Tarayyar Najeriya Yakubu Gowon wanda ke cikin shugabannin da suka kafa ECOWAS
ya yi kira ga kungiyar  da ta gaggauta cire Nijar din takunkumin da ta
kakaba mata.