An fara zanga-zangar tsadar rayuwa a jihar Oyo

Rahotanni daga garin Ibadan babban birnin jihar Oyo na cewa wasu matasa sun fito zanga-zanga kan tsadar rayuwa da ake fama da ita a fadin Nijeriya.

 Majiyar DCLHausa ta Nigerian Tribune ta ce matasan sun mamaye manyan titunan Ibadan dauke da kwalaye da rubutun cewa gwamnati ta hanzarta magance matsalar tsadar abinci.

 Nijeriya dai na cikin wani yanayi na tashin gwauron zabo da kayayyakin masarufi ke yi tun musamman ma a wannan shekarar ta 2024.

 Makamai milyan 200 ke hannun yan Nijeriya ba bisa ka’ida ba – Uba Sani 

Gwamnan jihar Kaduna, Sanata Uba Sani, ya koka kan yadda bindigu kusan miliyan 200 ke hannun yan Nijeriya da suka mallaka ba bisa ka’ida ba.

Gwamna Sani ya bayyana hakan ne a wata hira da gidan Talabijin na Channels TV Siyasar Lahadi.

Ya ce yaduwar bindigun ne ke haddasa tabarbarewar tsaro a kasar, inda ya yi kira da a sake duba dokar mallakar bindiga a kasar.

“Babu dalilin da zai sa Tinubu ya yi murabus” martanin APC ga PDP

Ministan yada labarai da wayar da kan jama’a, Mohammed Idris, ya dage cewa shugaban kasa Bola Tinubu ba zai yi murabus ba saboda halin kuncin da tattalin arzikin kasa ke ciki.

Ministan ya bayyana hakan ne a wata sanarwa da mai taimaka masa na musamman kan harkokin yada labarai, Rabiu Ibrahim ya sanya wa hannu, yayin da yake mayar da martani ga gwamnonin jam’iyyar PDP da suka yi kira ga shugaban kasar da ya yi murabus saboda halin kuncin da kasar ke ciki.

A cewarsa, kiran da gwamnonin jam’iyyar adawa suka yi ba wani abu ba ne illa wani yunkuri na karkatar da hankalin jama’a da ya kamata su shagaltu da goyon bayan kokarin shugaban kasar na kawo saukin tattalin arziki ga al’ummar Nijeriya.

Annobar murar tsuntsaye ta barke a jihar Kebbi

Dokta Alheri Ibrahim-Sanchi, Daraktan Kula da Dabbobi na Ma’aikatar Kiwon Lafiya ta Jihar Kebbi, ya ce gwamnatin jihar ta kara kaimi wajen ganin an dakile yaduwar cutar murar tsuntsaye da ta haifar da mummunar barna a jihar.

Ya bayyana hakan ne a lokacin da yake zantawa da ‘yan jarida jim kadan bayan fitar da wata gona da ta kamu da cutar da ke kauyen Amanawa, Kalgo, wajen Birnin Kebbi a ranar Lahadi.

Ya zuwa yanzu cutar ta kashe dawisu 14 a wurin da abin ya shafa.

Tawagar kwararru a karkashin “Kiwon Lafiya Daya” ne suka gudanar da fumigation, wadanda suka hada da kwararru daga ma’aikatun kiwon dabbobi, lafiya sa kuna na muhalli.

Sabanin jita-jitar da ake ta yadawa cewa fitacciyar jarumar Tiktok, Murja Kunya ta tsere daga gidan yari, kakakin gidan gyaran hali na Kano, Musbahu Kofar Nassarawa ya ce an sake ta ne biyo bayan umarnin kotu.

Kofar Nassarawa ta shaida wa DAILY NIGERIAN cewa an sake ta tun ranar Alhamis.

 “Kotu ce ta kawo mana ita domin a ci gaba da tsare ta, kuma kotun ce ta ba mu umarnin mu sake ta,” in ji shi.

Gwamnan Katsina Dikko Radda ya kafa dokar hana boye kayan abinci a jihar

Mai Girma Gwamnan jihar Katsina Malam Dikko Umaru Radda PhD ya saka hannu kan dokar da za ta hana mutane boye kayan abinci.

Kafa wannan doka na nufin hana wasu ‘yan kasuwa da ake zargi da boye kayan abinci a rumbuna daban-daban don kayan abincin su yi tsada.

Kazalika Gwamnan ya kafa wani kwamiti na musamman da za a dora wa alhakin bi lungu da sako na jihar don zakulo mutanen da suke boye kayan abinci.

Dokar ta haramta duk wani yunkuri na boye kayan abinci a duk fadin jihar. Kazalika, dokar ta lissafta kayan abinci da suka hada da shinkafa, masara, gero, dawa, waken suya, gyada da ma duk wani nau’in kayan abincin da karancinsa zai jefa al’ummar jihar Katsina cikin halin ha’ula’i.

Bugu da kari, wannan doka ta fayyace karara cewa duk mutumi ko kamfanin da aka samu da laifin boye kayan masarufi, to ya saba dokar da za a iya hukunta shi karkashin sashe na 114 a kundin penal code.

Sannan hatta wurin da aka kama cewa ana boye wadannan kayan abinci, za a barke shi a fitar da abincin don sayar wa al’umma a farashin da ya dace.

Ta bangaren kwamitin karta-kwana na task force da Gwamnan ya kafa kan wannan batu kuwa, an dora masa alhakin zakulo masu boye kayan masarufin a cikin jihar.

Bugu da kari, an kwamitin zai hada da jami’an tsaro don su kamo tare da gurfanar da wadanda aka samu da laifin. Kazalika, kwamitin zai gana da masu ruwa da tsaki kan harkar kayan masarufi a jihar don gudun kitso da kwarkwata.

Sannan wannan kwamitin zai rika kula da yadda ake safarar kayan abincin, daga sassan jihar daban-daban da ma tsallakawa da shi kasashen waje.

Ana kyautata zaton kwamitin zai kunshi shugaba da karin mambobi 10 da za su gudanar da wannan aiki.

Mai Girma Gwamna Malam Dikko Umaru Radda PhD ya rarraba hannu kan wannan doka a ranar Juma’ar nan 16 ga watan Fabrairun, 2024.

Isah Miqdad

SSA Digital Media for Chief Press Secretary 

16/2/2024