Mai Alfarma
Sarkin musulmi Alhaji Sa’ad Abubakar na uku ya gargadi gwamnatin Najeriya ta
gaggauta daukar matakin saukaka wa talakawa rayuwa da fatattakar yunwa, matukar
ba haka ba kuma ta kuka da kanta kan matakin da talakawan zasu dauka akanta.

Da ya ke yiwa manema
labarai jawabi a Arewa House da ke jihar Kaduna Sarkin musulmin yace sarakunan
gargajiya dana shugabannin addini sun gaji da tausar talakawa da kuma basu
hakuri, don haka babu makawa illa gwamnati dauki matakin saukaka rayuwa.

Ya ce a yanzu
talakawa sun kai geji kuma tura ta kai bango kana sarakunan gargajiya ba zasu
iya tare talakawa ba  idan suka fusata da
gwamnati.

Ya ce kullum maganar kenan da
gwamnati ke yi musu kan suci gaba da tausar talakawa, har zuwa yaushe ne za’a
ci gaba da bada hakuri? Har zuwa yaushe ne talakawa zasu ci gaba da mutuwa da
yunwa da sunan hakuri? a yanzu lokaci ne da gwamnati zata yi hakuri ta dauki
matakin da ya dace.

“Mun jima muna rokon talakawa, a
yanzu mun gaji, kunyar su muke ji, sun fara daina yarda da maganar mu, don babu
wata alamar sauki daga gwamnati don haka matukar gwamnati bata dawo cikin
hayyacin ta ba, to duk matakin da talakawa suka dauka tabbas ta kuka da kanta”
inji sarki musulmi.

‘Yan majalisar dokokin Najeriya 60 sun kada kuri’a
kan bukatar sauya tsarin tafiyar da gwamnatin Najeriya zuwa tsarin gwamnatin
Prime minister a maimakon shugaban kasa wanda aka fara amfani da shi a
jamhuriya ta farko.

‘Yan mahalisar su 60
sun gabatrwa majalisar wani kwarya-kwaryan kundin tsarin mulki, wanda suke
ganin matukar aka bi shi, za’a yi nasarar mayar da kasar kan tsarin na Prime
minister nan da shekara ta 2031.

Da yake yiwa manema labaran fadar shugaban kasa
jawabi bayan gabatar da kundin, mai magana da yawun yan majalisar su 60
Abdulsamad Dasuki, ya ce lokaci yayi da ya kamata a kawo karshen tsarin
shugaban kasa mai cikakken iko a Najeriya, la’akari da tsadar da yake da shi.

Duk da dai ‘yan majalisar sun nuna shakku game da
samun nasarar sauya tsarin gwamnatin kasar nan da shekara ta 2031, amma sun ce
karfin da tsarin shugaban kasa mai cikakken iko ya baiwa shugaban kasar ya yi
yawan da yake janyo ci baya ga kasa.

Tsohon sakataren gwamnatin tarayya Boss Mustapha,  ya bayyana cewa an kwaikwayi sa hannun tsohon shugaban kasa Muhammadu Buhari, don ba da izinin cire tsabar kudi dala miliyan 6.2 daga asusun babban bankin Najeriya.

Mustapha wanda ke ba da shaida a ci gaba da shari’ar da ake yi wa tsohon gwamnan babban bankin Najeriya, Godwin Emefiele, a gaban babbar kotun birnin tarayya Abuja a yau Talata, yace sa hannun tsohon shugaban kasar na jabu ne ba na gaskeba.

Da yake bayanin abin da ya faru, Mustapha ya ce shi ko tsohon shugaban kasa Muhammadu Buhari ba su amince da a cire kudaden ba.

Gwamnatin Tarayya na shirin kafa Hukumar da zata kula da daidaiton tashin farashin kayan masarufi a kasar

Mataimakin shugaban kasa Kashim Shettima ne ya bayyana hakan a yau Talata a wajen wani babban taro na kwanaki biyu kan sauyin yanayi da tsarin abinci a Abuja.

Shettima ya ce za’a baiwa hukumar damar tantancewa da daidaita farashin kayan abinci, tare da kula da tsarin tanadin abinci don daidaita farashin hatsi da sauran kayan abinci.

Shugaba Tinubu ya gana da kungiyar kwallon Super Eagles, inda ya karrama su da lambar yabo ta kasa MON da gidaje a babban birnin tarayya Abuja da filaye ga kowannen su a yau Talata.

Tawagar ta samu jagorancin ministan raya wasanni, Sanata John Owan Enoh gami da jami’an hukumar kwallon kafa ta Najeriya.

Ƙungiyar ƙwallon ƙafan dai ta zo na biyu a gasar cin kofin nahiyar Afirka da aka kammala a ƙasar Cote d’Ivoire.

 Tinubu na ganawa da tawagar kungiyar kwallon kafar Nijeriya Super Eagles

Shugaba Tinubu yana ganawa da kungiyar Super Eagles a fadar shugaban kasa dake Abuja.

Kungiyar Super Eagles dai ta sha kashi da ci 2-1 a hannun mai masaukin baki Ivory Coast a wasan karshe na gasar cin kofin nahiyar Afirka na shekarar 2023 a ranar Lahadin data gabata.

Bayan kammala wasan, shugaba Tinubu ya jinjina wa Super Eagles bisa jajircewar da suka nuna a wasan karshen.

Hukumar Hisbah a jahar Kano ta kama shahararriyar yar Tiktok Murja Ibrahim Kunya.

Gidan rediyon Freedom ta ruwaito labarin kama Murja a safiyar yau Talata.

Hakan dai ya biyo bayan farautar Murja tare da wasu ƴan Tiktok biyar da Hukumar Hisbah a Jihar ke yi.

Mutanen da hukumar ke nema sun haɗa da Murja, Abubakar Ibrahim (G-Fresh), Sadiya Haruna, Ashiru Idris (Maiwushirya), Ummee Shakira da Hassan Makeup.