Shugaban Hukumar kula da harkar shirya Finafinai a Najeriya kuma jarumi a Kamfanin shirya finafinai na Kannywood Ali Nuhu yana mai hangen cewa shirya nagartattun finafinai ka iya dawo da martabar Najeriya a idon Duniya.

Ali Nuhu ya gano wata matsala da ya ke gani idan aka shawo kanta, nagartattun finafinai na ƙasar zasu iya kaiwa kaso saba’in zuwa saba’in da biyar cikin ɗari, saɓanin yanzu da ake da kaso talatin zuwa talatin da biyar cikin ɗari na nagartattun finafinai a ƙasar.

Daga cikin turbar cimma wannan buri na sabunta Najeriya ta hanyar finafinai Ali Nuhu a wani labari da Jaridar Daily Trust ta wallafa ya ce akwai karin ilimi ga masu harkar ta film da kuma samar musu kayakin aiki irin na zamani.

A cewar Ali Nuhu akwai wasu da ke ɓata suna Najeriya daga cikin ‘yan ƙasar wadda idan aka dukufa ta hanyar nan ta finafinai za’a wanke ƙasar da waccan ɓãtanci, ya kuma nuna muhimmancin manyan kamfanonin finafinai na Kannywood da Nollywood su hada kai wuri guda.

Kwamitin kwamishinonin kiwon lafiya a Arewa maso gabashin Najeriya na bukatar Hukumar Raya Cigaban yanki wato North East Development Commission ta yi hoɓbasa wurin ceto rayukan jarirai da iyayen su da ke mutuwa kafin da kuma bayan haihuwa.

A cewar wannan kwamiti kaso talatin cikin ɗari na mutuwar mata masu juna biyu da jariri a Najeriya ya ke faruwa, saboda haka shugaban wannan kwamiti Farfesa Baba Malam Ganã a wata ganawa da suka yi da hukumar ta NEDC ya ce ya kamata hukumar ta yi dukkan mai yiyuwa wurin taimakawa, dan ganin an magance matsalar. 

Wannan matsala inji Farfesa Ganã tana tayar da hankalin hukumomin kiwon lafiya a Arewa maso gabashin Najeriya.

Rahoto na baya-bayanan da Hukumar Lafiya ta Duniya WHO ta fitar ya nuna cewa Nijeriya ce ta biyu a irin wannan matsala ta mace-macen mata masu juna biyu da yara ƙanana.

Gwamnatin jahar Kebbi ta rufe wasu man’yan makarantu biyu masu zaman kansu bisa rashin biyan haraji har na tsawon shekaru biyu.

A wata sanarwa da ta fito daga ofishin Kwamishinan ilimin na jahar Isa Abubakar Tunga ta nuna cewa gwamnati bazata yi musu da wasa ba saboda sakaci da suka yi bayan tunatar da su da kuma kashedi da gwamnati ta yi garesu a lokuta daban-daban.

Makarantun da aka rufe sune Kwalejin ilimi da kimiyyar kiwon lafiya ta Lamiɗo Umaru Mutube da ke Ɗakin- Gari da Kwalejin Kimiyya da fasahar kiwon lafiya ta SAHAM da ke Zuru.

Gwamnatin ta Kebbi ta ce babu wata bita da ƙulli a batun dakatarwa kuma da zãrar sun biya kuɗaɗen da gwamnati ke bin su za’a buɗe makarantun su ci gaba da harkokin karantarwa.

Binciken hukumar kula da ilimi ta Majalisar Ɗinkin Duniya UNESCO na 2012 ya nuna cewa Jihar Kebbi dai na daga cikin jihohin Najeriya da ke baya a ɓangaren ilimi bayan jihohin Katsina, Taraba, Borno da Jigawa.