Gwamnatin tarayya ta mayar wa da sanata Ali Ndume martani
game da kalaman da yayi da ke nuni da cewa gwamnatin na kullawa ‘yan arewa wata
makarkashiya, shine ma dalilin da ya sa zata mayar da wasu sassan CBN da
hukumar kula da zirga-zirgar jiragen sama zuwa jihar Lagos.

Ta cikin wata sanarwa da gwamnatin ta fitar, ta ce wannan
ba komai bane illa yunkurin tunzura ‘yan arewa a kan ‘yan kudu, kuma ba zai yi
nasara ba.

Kalaman na Sanata Ndume sun biyo bayan sanarwar
gwamnati na mayar da wasu sassa masu muhimmanci na babban bankin kasa CBN da
kuma hukumar kula da zirga-zirgar jiragen sama zuwa jihar Lagos ba tare da
bayar da wani gamsashen dalili ba.

Tun bayan fitar wannan labari ne ‚yan arewa ke mayar
da mabanbantan martani, yayin da wasu ke ganin wannan ba komai bane illa
yunkurin mayar da arewa saniyar ware, inda kuma wasu ke da ra’ayin cewa hakan wani
salo ne na shirin raba kasar.

Baya
ga wannan an kuma zargi gwamnatin ta Tinubu da yunkurin mayar da fadar shugaban
kasa kachokan zuwa jihar Lagos, sai dai tuni gwamnatin ta musanta wannan zargi.

Gwamnan jihar Katsina Malam Dikko Umaru Radda, ya bayar da tabbacin cewa duk masu rike da mukaman siyasa da na gwamnati a jihar za su bayyana kadarorin su.

Raɗɗa ya bayar da wannan tabbacin ne a jiya Litinin a lokacin da ya karbi baƙuncin shugaban hukumar da’ar ma’aikata, Barista Murtala Aliyu Kankia, a fadar gwamnatin jihar.

A jawabin nasa shugaban hukumar da’ar ma’aikata, Barr. Aliyu Kankia ya bayyana irin rawar da Ofishin sa ke takawa, ba wai kawai sa ido kan bayanan kadarori ba, har ma da tabbatar da bin ka’idojin na da’a ga jami’an gwamnati.

Jami’an tsaro na farin kaya, sun kama shugaban kungiyar Miyetti Allah Kautal Hore, Bello Bodejo.

Rahotanni sunce kamun nasa ya biyo bayan kirkiro wata ƙungiyar yan sakai da Miyetti Allah ta ƙirƙira jihar Nasarawa.

An cafke Bodejo a yau Talata a babban ofishin Miyetti Allah da ke kusa da Cocin Goshen da misalin karfe 3:40 na yammacin yau Talata.

Ana zargin kwamishinan matasa da ci gaban wasanni na jihar Taraba Joseph Joshua da mallakar digiri na bogi daga wata jami’a a jamhuriyar Benin.

Zargin yana kunshe ne a cikin wata takardar ƙorafi da aka rubuta zuwa ga hukumar tsaro ta farin kaya da rundunar yan sandan jihar.

Wani lauya mai zaman kansa a jihar, Nasiru Muhammad, ne ya rubuta takardar koken a ranar 15 ga watan Janairu a madadin wani mai fafutuka Sulaiman Adamu.

Ganduje da Kwankwaso

Shugaba Tinubu ya fara yunkurin sasanta jagoran jam’iyyar NNPP na kasa, Rabi’u Kwankwaso da kuma shugaban jam’iyyar APC na kasa, Abdullahi Ganduje.

A cewar jaridar Daily Trust wasu majiyoyi sun tabbatar mata a jiya Litinin cewa Tinubu ya bayyana aniyarsa ga shugabannin biyu na su sasanta kansu.

Wasu majiyoyi na kusa da Ganduje sun tabbatar da cewa Tinubu ya bukaci shugaban jam’iyyar da ya gana da masu ruwa da tsaki na jam’iyyar APC a Kano ranar Alhamis mai zuwa, tn are da fara aikin hadin kai a tsakaninsu.