Kungiyar kwadago ta Najeriya ta mayarwa da shugaban kasar martani kan
alkawarin sa na sabuwar shekara game da shirin yiwa ma’aikatan kasar karin albashi.

Kungiyar karkashin jagorancin Joe Ajero ta ce babu wani dalili da zai sa
ta amince gwamnatin tarayya ta yi gaban kanta wajen Karin albashi, a wannan
karo ya zama wajibi a tattauna da su kafin karin albashin.

Shekarar 2018 ce shekara
ta karshe da gwamnatin tarayya ta tattauna da kungiyar kwadago kafin kara albashi.

Kungiyar ta ce gwamnati ta
jima tana yi mata dadin baki game da karin albashi, sai dai a wannan karon ya
zama wajibi ta dauki mataki, don shiga yarjejeniya da gwamnatin tarayya a watan
Afrilu mai zuwa.

Sai dai babban abinda ya
fi daukar hankali a cikin sanarwar da kungiyar ta fitar shine, yadda ta ce ba
zata amince da kasa da naira dubu 200 a matsayin mafi karancin albashi ba.

Al’ummar Najeriya sun fada
cikin halin masti tun bayan da gwamnatin Tinubu ta cire tallafin man fetur da
yadda darajar naira ke kara sulalewa, yayin da kayan masarufi ke kara tsada
dalili kenan da ya sa kungiyar kwadagon ke ganin bai kamata ma’aikata su rika
karbar kasa da naira dubu 200 a matsayin albashi ba.

Ƙungiyar ɗaliban Najeriya (NANS) a jamhuriyar Benin ta bayyana cewa sama da dalibai 15,000 ne suka shiga halin kaka-ni-kayi, sakamakon haramta wasu jami’o’i da gwamnatin Nijeriya ta yi a kasar.

Shugaban ƙungiyar a Jamhuriyar Benin, Ugochukwu Favor, ne ya bayyana hakan a cikin wata tattaunawa da ya yi da gidan talabijin na Channels.

A yayin tattaunawa Favor ya yi kira da a sassauta wannan mataki musamman a kasashe Benin da Togo.

Hakan dai na zuwa ne bayan da wani ɗan jarida mai binciken kwakwaf ya fallasa yadda ake samun takardar shaidar kammala makarantun a kasashen.

Shugaban kungiyar daliban ya ce kamata ya yi gwamnati ta yi bincike mai zurfi don gano wadanda ke da hannu a badakalar kuma a hukunta su.

Ministan ayyuka a Nijeriya Sen. David Umahi, ya ce kamfanin Julius Berger na neman karin Naira Tiriliyan N1.35tr domin kammala aikin hanyar Abuja-Kaduna-Kano.

Ministan ya bayyana hakan yayin da yake yi wa manyan Daraktocin ma’aikatar ayyukan jawabi a ranar Alhamis. 

Aikin dai na daya daga cikin ayyukan da gwamnatin Shugaba Tinubu ta gada daga tsohuwar gwamnatin shugaba Buhari.

Majalisar dattawan Nijeriya za ta tattauna kan kudirin da zai ba ‘yan kasa damar mallakar makamai domin kare kansu.

Jaridar Leadership ta ruwaito sanata mai wakiltar Delta ta Arewa a majalisar Prince Ned Nwoko ne ya gabatar da kudirin dokar, domin yin gyara a dokar da ake da ita ta mallakar makami ga farar hula.

Ya kara da cewa barazanar tsaro da ‘yan kasa ke fuskanta ya sa mutane da yawa cikin halin kunci da rashin kwanciyar hankali inda ya kara da cewa kudirin nasa zai baiwa fararen hula damar mallakar makamai da za su kare kansu.

Daga karshe Sanatan ya yi fatar abokan aikin nasa za su goyi bayan kudirin.