Gwamnan jihar Zamfara, Dauda Lawal ya sanar da shirin ƙara albashi ga limaman Juma’a 11,300 da malaman addinin Musulunci a faɗin jihar, inda sabon tsarin zai fara aiki daga Janairu 2026.

Gwamnan ya bayyana hakan ne yayin da ya ke ganawa da Malaman addini.

Ya jaddada kudirin gwamnatinsa na inganta walwala da yanayin malamai da limamai a jihar.

A cewarsa, gwamnatin jihar na kashe Naira miliyan 81.8 a kowane wata wajen biyan alawus-alawus ga limamai, malamai da masu tsaftace masallatai.

Ya ce shirin ya biyo bayan shawarar kwamitin da gwamnan ya nada inda ya ba da shawarar a kara albashinsu.

Rundunar sojin saman Nijeriya ta bayyana samun gagarumar nasara bayan kai hare-hare na musamman kan maboyar ’yan bindiga a jihar Zamfara, inda aka hallaka da dama daga cikinsu tare da tarwatsa sansanoninsu.

Daraktan yada labaran rundunar Air Commodore Ehimen Ejodame ne ya bayyana hakan a cikin wata sanarwa ya ce hare-haren sun gudana ne a ranar Lahadi a ƙarƙashin Operation Pansar yamma bayan samun bayanan sirri daban-daban.

A cewarsa, an kai harin ne a Turba Hill da kuma sansanin Kachalla Dogo Sule da ke karamar hukumar Tsafe ta jihar Zamfara waɗanda aka bayyana a matsayin manyan maboyar ’yan bindiga da ke da alaƙa da hare-haren da suka faru a yankin Arewa maso Yamma.

Ministan Abuja Nyesom Wike ya musanta zargin da wasu ke yi cewa yana goyon bayan Tinubu a ɓoye, yana mai jaddada cewa matsayarsa ta siyasa a fili take kuma ba ta taɓa canzawa ba.

Wike ya yi wannan bayani ne yayin da ya ke mayar da martani kan wasu kalamai da aka danganta da gwamnan jihar Rivers Siminalaye Fubara, wanda ya bayyana cewa wasu ’yan siyasa na yin yarjejeniya a boye.

A farkon watan Disamba gwamna Fubara ya fice daga jam’iyyar PDP zuwa APC, bayan wata ganawa ta sirri da Shugaba Tinubu a Abuja, matakin da wasu ke ganin wata dabara ce ta siyasa gabanin babban zaɓe mai zuwa.

‘Yan majalisar wakilai marasa rinjaye sun nuna bukatar gwamnatin Nijeriya ta dakatar da aiwatar da sabbin dokar gyaran haraji har sai an kammala bincike kan zargin cewa an yi wa dokokin sauye-sauye bayan majalisa ta amince da ita.

An bayyana wannan bukata ce a cikin wata sanarwa da aka fitar ranar Lahadi wacce Honarabul Kingsley Chinda tare da mataimakinsa Aliyu Madaki da George Ozodinobi suka sanya wa hannu.

’Yan majalisar sun bayyana cece-kucen da ke tattare da dokokin harajin a matsayin abin damuwa sosai, suna cewa ya cancanci cikakken bincike domin kare martabar majalisa da bin doka da oda.

Gwamnatin kasar Birtaniya ta sanar da dakatar da tsarin ba ’yan Jamhuriyar Dimokuraɗiyyar Congo biza, lamarin da ake zargin zai shafi matafiya daga ƙasar da dama.

Wannan mataki, kamar yadda hukumomin Birtaniya suka bayyana, ya biyo bayan kin karɓar ’yan ƙasar da suka shiga Birtaniya ba bisa ƙa’ida ba.

Baya ga haka, Birtaniya ta ce manyan jami’an gwamnati da manyan baki daga Congo za su rasa damar shiga kasar kamar yadda suka saba a baya.

Rahotanni sun nuna cewa a cikin watan Nuwamba, ma’aikatar cikin gida ta Birtaniya ta gargadi DR Congo, Angola da Namibia cewa za su fuskanci takunkumin biza matuƙar ba su karɓi ’yan gudun hijira da kuma ’yan ƙasarsu masu aikata laifuka a kasashen ƙetare ba.

Kamfanin man fetur na Nijeriya, NNPC Limited ya bayyana cewa ana sa ran aikin bututun gas na Ajaokuta–Kaduna–Kano AKK wanda darajarsa ta kai dala biliyan 2.8 zai fara aiki a farkon shekarar 2026.

Shugaban kamfanin NNPCL Bashir Bayo Ojulari ne ya bayyana hakan bayan kammala duba aikin da Ministan harkokin albarkatun man fetur Ekperikpe Ekpo ya jagoranta tare da manyan jami’an NNPCL.

Ojulari ya ce NNPCL ta kammala manyan layukan bututun gas na AKK, wanda ya shafe shekaru da dama ya ana gudana.