Gwamnatin Mulkin Soji a Burkina Faso ta saki sojojin Najeriya 11 da ta tsare bayan jirgin da ya tashi daga Legas ya yi saukar gaggawa a Bobo-Dioulasso saboda matsalar na’urori.

Kungiyar kasashen kawance ta AES ta bayyana lamarin a matsayin “Rashin dattako,” inda jirgin na Nijeriya kirar C-130 ya shiga sararin samaniyar Burkina Faso ba tare da izininsu ba.

An tabbatar da cewa dakarun da ke cikin jirgin sun samu damar komawa Najeriya, duk da har yanzu ba a bayyana ko an saki jirgin ba.

Gidan Talabijin na TVC ya ruwaito jirgin ya sauka ne bisa ka’idojin tsaro na kasa da kasa yayin tafiya zuwa Portugal.

Kakakin Rundunar Sojin Sama ta Najeriya, Ehimen Ejodame, ya ce an yi bincike, kuma sojojin da aka tsare an kula da su yadda ya kamata, yayin da ake shirin ci gaba da aikin jirgin.

Gwamnatin Nijeriya ta fara tattaunawar diflomasiyya domin kubutar da sojojin Najeriya da jirgin saman yaƙin kasar C-130 da gwamnatin sojin Burkina Faso ta tsare saboda zargin karya dokar shiga sararin samaniyarta.

Sojojin da jirgin, waɗanda ake tsare da su tsawon kwanaki uku, sun ci gaba da kasancewa a hannun hukumomin Burkina Faso, inda majiyoyin soji suka tabbatar cewa Ma’aikatar Harkokin Waje ce yanzu ke jagorantar lamarin.

Jaridar Punch ta ruwaito cewa Kakakin ma’aikatar, Kimiebi Ebienfa, ne ya tabbatar da yadda ofishin jakadancin Najeriya a Ouagadougou ya fara tattaunawa da hukumomin ƙasar domin ganin an saki dakarun da jirgin.

A bangaren Burkina Faso, hukumar labarai ta ƙasa ta sanar cewa an tilasta jirgin na NAF dauke da sojoji 11 yin saukar gaggawa bayan zargin karya dokar shiga sararin samaniya, lamarin da ƙungiyar AES ta kira take hakkinsu na ikon ƙasa.

Rundunar Sojin Saman Najeriya ta ce sojojin da ke cikin jirgin suna cikin koshin lafiya, tana mai bayyana cewa jirgin ya sauka ne a Bobo-Dioulasso bayan gano matsalar na’ura jim kadan bayan tashi daga Legas.

Najeriya ce a sahun gaba na mafi yawan hukuncin Kotun ECOWAS da ba a aiwatar ba, a cewar alkaluman da Mataimakin Babban Rijistaran Kotun, Gaye Sowe, ya gabatar yayin bikin Ranar Kare Hakkokin Dan Adam ta Duniya a ranar Laraba.

Sowe ya bayyana cewa Najeriya na da hukunci 50 da har yanzu ba a aiwatar da su ba, cikin jimillar 125 na shari’u da kotun ta yanke kan ƙasar.

Inda ya ce wannan na nuna matsalar rashin bin hukunci a ƙasashe da dama na yankin.

Jaridar Punch ta Ambato shi na bayyana cewa tun kafuwar Kotun ECOWAS, ta yanke hukunci 492 kan ƙasashe mambobi 12, inda 192 daga ciki suka kasance masu bukatar aiwatarwa kai tsaye. A halin yanzu akwai shari’u 136 da ke jiran hukunci.

A bayanin rabon ƙasashe, Sowe ya ce kasashen Benin, Cape Verde, Côte d’Ivoire, Ghana, Guinea, Senegal, Sierra Leone da Togo suma na da tarin hukuncin da ba su aiwatar ba. Amma Najeriya ce ta fi yawan adadin.

Shugaban Kotun ta ECOWAS, Ricardo Gonçalves, ya ce duk da yanke muhimmam hukunci kan ’yancin rayuwa, ’yancin bayyana ra’ayi, taro, ilimi da sauran su, ƙasashe da dama sun kasa aiwatar da su, lamarin da ke tauye ingancin kare hakkin dan adam a yankin.

Kwamitin Kasafin Kuɗi na Majalisar Wakilan Amurka ya sake jaddada ƙudirin Amurka na yaƙi da cin zarafin addini a duniya, musamman a Najeriya.

Jaridar Punch ta Ambato wata sanarwa da suka wallafa a shafinsu na X a ranar Laraba, sun ce Amurka ba za ta yi shiru ba yayin da ake kashe rayuka ba gaira ba dalili.

Wannan na zuwa ne bayan ziyarar da tawagar ‘yan majalisar Amurka ƙarƙashin jagorancin Riley Moore suka kai Najeriya bisa umarnin Shugaba Donald Trump.

Mai ba shugaban Najeriya shawara kan tsaro, Nuhu Ribadu, ya tabbatar da cewa ziyarar ta mayar da hankali kan ƙarfafa haɗin gwiwar yaƙi da ta’addanci, inganta tsaro a yankin, da kuma karfafa dangantakar tsaro tsakanin Najeriya da Amurka.