Gwamnatin Nijeriya ta haramta karɓar kuɗi a hannu domin biyan kudaden shiga, tare da umartar dukkan ma’aikatunta su girka na’urar POS cikin kwanaki 45.

Sabon umarnin ya fito ne daga ofishin Akantan Janar na Ƙasa, Shamseldeen Ogunjimi, wanda ya ce duk huldar biyan kuɗi ga Gwamnatin Tarayya dole ne ya rika bi ta tsarin amfani da asusun bai daya (TSA).

Takardar ta bayyana cewa duk wani karɓar kuɗi kai tsaye–ko a Naira ko a sauran kudade ya sabawa dokokin gwamnati, kuma yana lalata amincin tsarin e-payment da e-collection.

Jam’iyyar APC ta yi kira da a kara hakuri da kuma bai wa jami’an tsaro goyon baya yayin da suke kokarin ceto yaran da aka sace da kuma yaki da matsalar tsaro a fadin Nijeriya.

A wata hira da Channels TV, kakakin jam’iyyar, Felix Morka, ya ce kare rayuwar yaran da aka sace shi ne babban abin da gwamnati ke muradi, don haka dole jami’an tsaro su yi aiki cikin taka tsantsan.

Ya ce ayyukan ceto yara na bukatar kulawa ta musamman saboda kuskure kadan na iya jefa su cikin hatsari. Morka ya roki ‘yan Najeriya da su nuna hakuri da fahimta ga kokarin rundunonin tsaro.

Rahoton jaridar Punch ya ce Morka ya kuma yaba da jajircewar sojoji da sauran jami’an tsaro da ke sadaukar da rayukansu don kare kasar.

Shugaban jam’iyyar APC na Jihar Taraba, Ibrahim Tukur, ya tabbatar cewa gwamnan jihar, Agbu Kefas, zai sauya sheƙa zuwa APC a hukumance a watan Janairu 2026.

Rahoton gidan talabijin na Channels ya ce an dage sauyin sheƙan da aka tsara ranar 19 ga Nuwamba saboda sace ɗalibai a Jihar Kebbi.

A wani taron manema labarai a Jalingo, Tukur ya ce an ɗauki matakan dakatar da wasu shugabannin ƙananan hukumomi saboda saba wa kundin tsarin jam’iyya, sannan ya nemi sulhu da mabiya maimakon zuwa kotu.

Haka kuma, an soke dakatarwar ɗan majalisar jihar Taraba, Abel Peter, da aka dakatar saboda zargin yin aiki da ya saba wa jam’iyya.

Shugaban jam’iyyar ya kuma yi watsi da ikirarin tsohon mataimakin shugaban ƙasa, Atiku Abubakar, na ɗaukar mulki a Taraba, inda ya ce APC ta riga ta karɓi fadar gwamnatin jihar kuma ba ta da niyyar janyewa.

Fadar shugaban kasa ta ce yunkurin juyin mulkin da aka dakile a Jamhuriyar Benin ya kara nuna rawar jagoranci da shugaban kasa Bola Ahmed Tinubu ke takawa wajen kare dimokuraɗiyya da zaman lafiya a Yammacin Afirka.

Jaridar Punch ta ruwaito cewa a ranar Lahadi wasu sojoji karkashin Lt. Col. Pascal Tigri sun mamaye gidan talabijin na gwamnati a Cotonou, inda suka yi ikirarin hambarar da gwamnatin Shugaba Patrice Talon.

Sai dai dakarun gwmnatin kasar da ke tsaron fadar shugaban kasar sun sanar da tarwatsa su cikin gaggawa.

A wata sanarwa da mai taimaka wa shugaban Nijeriya kan harkokin sada zumunta, Dada Olusegun, ya fitar a shafinsa na X, ya ce martanin Nijeriya cikin sauri ya tabbatar da matsayin Tinubu na kare tsarin mulki a yankin.