Sanannen shugaban ‘yan bindiga, Kachalla Yellow Danbokolo, ya rasa ransa a Zamfara bayan harbin da ya sha a artabu da dakarun sa-kai na Shinkafi.
Danbokolo, wanda ake ganin ya fi Bello Turji hatsari, rahoton jaridar the Nation yace dan kawun Bello Turjin ne, wanda aka yi ajalinsa a karshen mako, tare da ‘yan bindiga 173 da suka rasu a samamen.
Labarin kawar da Danbokolo ya haifar da murna a Kurya da sauran yankunan da ya addaba, inda jama’a ke cewa shi ne jagoran manyan hare-hare, yayin da Turji ya yi kaurin suna wajen yada farfaganda a harin da yake kaiwa kayukan yankin na Arewa maso yamma.
