Ma’aikatan gwamnati a jihohi daban-daban sun bayyana cewa sabon mafi karancin albashi na N70,000 ba ya isar karamin ma’aikaci musamman duba da tsadar rayuwa sakamakon hauhawar farashin kayayyaki.
Wannan na zuwa ne a yayin da kungiyoyin kwadago ke bikin ranar ma’aikata ta bana a fadin Nijeriya.
A shekarar da ta gabata ne shugaban kasa Bola Ahmed Tinubu ya amince da biyan mafi karancin albashi na N70,000 ga ma’aikatan Najeriya, hakama wasu jihohin sun amince da biyan ma’aikatansu fiye da N70,000.
Duk da haka, wasu ma’aikata a jihohi daban-daban sun nuna damuwarsu kan yadda albashinsu ke kasawa wajen biyan bukatunsu.
