Sanannen Malamin addinin Musulunci Sheikh Ahmad Gumi ya mayar da martani ga masu kira da a kama shi kan tsokacinsa game da matsalar ‘yan bindiga da tsaro, inda ya kare rawar da yake takawa wajen shiga tsakanin tattaunawa da kungiyoyin ta’addanci domin neman samun zaman lafiya.

Jaridar Punch ta rawaito cewa Gumi ya dade yana bayyana kansa a matsayin wanda ke shiga tsakani tsakanin gwamnati da ‘yan bindiga, sai dai wasu na zarginsa da kare ‘yan ta’adda saboda ya fi jaddada maganar tattaunawa maimakon amfani da karfin soja.

A wata sanarwa da ya wallafa a shafinsa na Facebook ranar Lahadi, malamin ya bayyana masu kira da a kama shi a matsayin marasa kishin kasa da basu son gaskiya, inda ya ce aikinsa na shiga tsakanin tattaunawa da ‘yan bindiga ba wani laifi ba ne, domin kokari yake yi wajen kawo karshen tashin hankali.

Shugaban Nijeriya Bola Ahmed Tinubu na shirin fitar da jerin sunayen jakadu da za su wakilci Nijeriya a manyan kasashe cikin makonni masu zuwa, a cewar majiyoyi daga fadar shugaban kasa.

Wannan mataki na zuwa ne bayan damuwar da jama’a ke nunawa kan yadda rashin jakadu ya rage karfin diflomasiyyar Nijeriya, musamman a kasashen da ke da muhimmanci ga hulɗar ƙasa da ƙasa.

Jaridar Punch ta ruwaito cewa Tinubu ya janye dukkan tsoffin jakadu a watan Satumban 2023 domin sake fasalin manufofin ƙasar a ketare, sai dai jinkirin tantance sababbin jakadu ya kai shekara biyu ba tare da sabbin nade-naden ba.

Gwamnan jihar Filato, Caleb Mutfwang, ya nesanta kansa daga matakin jam’iyyar PDP na korar Ministan Abuja, Nyesom Wike, da tsohon Gwamnan Ekiti, Ayodele Fayose, da sauran manyan jiga-jigai da aka zarga da yi wa jam’iyyar zagon kasa.

A cikin wata sanarwa da daraktan yada Labaran gwamnan Gyang Bere ya fitar, Mutfwang ya bayyana cewa wannan batu ba a tattauna shi ba a taron Gwamnonin PDP kafin a gabatar da shi a gangamin jam’iyyar da ake gudanarwa a Ibadan.

Ya ce matakin da aka dauka bai dace ba, kuma ba shi ne hanya mafi dacewa don magance rikicin jam’iyyar ba.

Mataimakin shugaban jam’iyyar APC na kudu maso gabashin Nijeriya Ijeoma Arodiogbu, ya ce rade-radin da ake yi cewa Atiku Abubakar da Sanata Rabiu Musa Kwankwaso na shirin yin kawance kafin zaben 2027 ba shi da tushe ballantana makama.

Jaridar Punch ta rawaito Arodiogbu na cewa babu wata hanya da tsohon gwamnan na Kano zai koma tafiya ɗaya da Atiku, duk da kyakkyawar mu’amalar da suka nuna a bikin zagayowar ranar haihuwar Kwankwaso makonni biyu da suka gabata.

Ya ce idan Kwankwaso zai yi wani sauyi, zai fi dacewa ya koma APC domin hakan zai fi amfani a siyasarsa, ya ce ko da Atiku ya yi yunƙurin bai wa Kwankwaso wata dama hakan ba zai yi wani tasiri ba.

Shugaban hukumar yaki da sha da fataucin miyagun kwayoyi ta Nijeriya NDLEA, Janar Buba Marwa (rtd), ya bayyana cewa wa’adinsa na biyu zai zama mafi tsauri ga duk masu hada-hadar kwayoyi a fadin ƙasar.

A wata sanarwa da daraktan yada labarai na hukumar, Femi Babafemi, ya fitar a Abuja ranar Asabar, Marwa ya yi wannan gargadi ne yayin da ya koma ofis bayan sake nada shi da Shugaba Bola Tinubu a ranar 14 ga Nuwamban 2025.

Marwa, yayin da yake jawabi ga daruruwan ma’aikata da suka taru domin taya shi murna, ya ce sabon wa’adin na shi zai zama mai matukar kunci ga dilolin miyagun kwayoyi.

Tsohon Gwamnan jihar Jigawa, Sule Lamido, ya ce ya kai kara kotu ne domin kare haƙƙinsa a jam’iyyar PDP, tare da jaddada cewa ba zai halarci taron babbar jam’iyyar da za a gudanar a karshen mako ba.

Lamido ya bayyana hakan ne a wata hira da ya yi da gidan talabijin na Channels inda ya yi bayani kan dalilan daukar matakin.

Ya kara da cewa matakin kotu da ya dauka ba ya da wata alaka da rikicin jam’iyyar, illa kawai neman adalci da gyaran kuskuren da aka yi masa ne.