Kungiyar Kiristoci ta Nijeriya reshen jihar Neja, CAN, ta bayyana rashin gamsuwa da kudurin dokar Hisbah da majalisar dokokin jihar ke shirin amincewa da ita inda tace hakan na nuna wariya da nuna bambanci ga Kiristoci.

Jaridar Daily Trust ta rawaito cewa CAN ta ce dokar za ta ƙara raba kan al’umma da ke addini daban-daban a jihar, maimakon ta ƙarfafa zaman lafiya da haɗin kai.

Shugaban CAN na jihar Neja, Most Rev. Bulus Dauwa Yohanna, ya yi gargadin cewa kudurin dokar hukumar Hisbah wanda ɗan majalisar da ke wakiltar mazabar Chanchaga, Mohammed Abubakar, ya gabatar, na iya jawo cece-kuce kuma bai kamata bangaren zartarwa ya amince da shi ba.

Hukumar ICPC mai yaki da ayyukan rashawa a Nijeriya ta fara bibiyar ayyuka 64, na ‘yan majalisa da aka kiyasta kuɗinsu kimanin Naira biliyan 21.6 a jihar Sokoto.

Jaridar PUNCH ta rawaito cewa wannan bincike na karkashin mataki na 8 a shirin ICPC na bibiyar ayyukan ‘yan majalisa wanda ake aiwatarwa a jihohi daban-daban na ƙasar.

Shugaban tawagar binciken, Aminu Bala, ya bayyana cewa za su duba ayyuka a fannoni daban-daban kamar kiwon lafiya, ilimi, samar da ruwan sha, noma, da kuma lantarki.

A cewarsa, sun gano kura-kurai a wasu ayyuka da aka aiwatar a Kalambaina da Gwuiwa a karamar hukumar Wamakko, da kuma Mabera da Mana a Sokoto ta Kudu.

Tsohon Sanata mai wakiltar Kaduna ta Tsakiya, Shehu Sani, ya bukaci hukumomin tsaro da na yaki da cin hanci su gudanar da cikakken bincike kan wa’adin shekaru takwas na tsohon gwamnan jihar Kaduna, Nasir El-Rufai, bisa zargin almundahana da cin zarafi.

Kamfanin dillancin labaran Nijeriya NAN ya rawaito cewa Shehu ya yi wannan kira ne yayin taron manema labarai a Kaduna, inda ya bukaci hukumomin su binciki abin da ya kira karkatar da kudaden al’umma da suka kai daruruwan biliyoyin naira a tsakanin 2015 zuwa 2023.

Ya kuma yi kira ga hukumar yaki da yi wa tattalin arziki zagon kasa ta Nijeriya EFCC, da ta dauki mataki kan rahotannin da majalisar dokokin jihar Kaduna ta fitar na zargin aikata ba daidai ba, domin tabbatar da adalci.