Monday, April 6, 2026
Home Blog Page 22

El-Rufai ya zargi gwamnatin Tinubu da hannu a yunƙurin sanya Kwankwaso cikin jerin takunkumin Amurka

Muhammad Jamil
-
0
El-Rufai ya zargi gwamnatin Tinubu da hannu a yunƙurin sanya Kwankwaso cikin jerin takunkumin Amurka

Tsohon gwamnan Kaduna, Malam Nasir El-Rufai, ya yi zargin cewa gwamnatin Shugaba Bola Ahmed Tinubu na iya kasancewa a bayan yunƙurin dan Majalisar Dokokin Amurka, Riley Moore, na sanya tsohon gwamnan Kano, Rabiu Musa Kwankwaso, cikin jerin sunayen da za a kakaba wa takunkumi kan zargin take ‘yancin addini.

Da yake magana a shirin Prime Time na Arise TV, El-Rufai ya ce saka sunan Kwankwaso cikin kudirin dokar da Moore da Chris Smith suka gabatar ba adalci ba ne, yana mai danganta lamarin da kin komawar Kwankwaso jam’iyyar APC da kuma jita-jitar komawarsa ADC.

Kudirin dokar ya tanadi kakaba takunkumi ciki har da hana biza da daskarar da kadarori ga wasu da ake zargi da hannu a take ‘yancin addini a Nijeriya, inda aka ambaci Kwankwaso da wasu kungiyoyi makiyaya.

Sai dai El-Rufai ya bukaci ‘yan Nijeriya su yi taka-tsantsan, yana mai cewa matsalar tsaro a ƙasa ta shafi kowa ba tare da la’akari da addini ba, tare da sukar tsarin tsaro da ya ce ya gaza kare rayuka da dukiyoyin al’umma.

Shehu Sani ya karyata El-Rufai kan batun bacewar Dadiyata

Muhammad Jamil
-
0
Shehu Sani ya karyata El-Rufai kan batun bacewar Dadiyata

Tsohon Sanatan Kaduna ta Tsakiya, Comrade Shehu Sani, ya karyata ikirarin tsohon gwamnan Kaduna, Malam Nasir El-Rufai, cewa Abubakar Idris wanda aka fi sani da Dadiyata ba mai sukar gwamnatin Kaduna ba ne.

Dadiyata, malami a Sashen Turanci da Ilimin Harshe na Jami’ar Tarayya ta Dutsinma, an sace shi a gidansa da ke Kaduna ranar 2 ga Agusta, 2019, kuma tun daga lokacin ba a sake jin duriyarsa ba ko fitar da cikakken bayani daga hukumomi.

A wata hira da El-Rufai ya yi a ARISE NEWS, ya ce Dadiyata ya fi sukar gwamnatin Kano ne da Abdullahi Ganduje, ba gwamnatin Kaduna ba. Sai dai Shehu Sani ya mayar da martani a shafinsa na X, yana cewa Dadiyata mai sukar gwamnatin Kaduna ne kuma mazaunin Kaduna.

Sani ya kuma ce tun bayan sace Dadiyata babu wata sanarwa a hukumance daga gwamnatin Kaduna ko ziyarar ta’aziyya ga iyalansa, yana mai cewa iyalansa na nan a shirye su yi bayani ga duk mai neman gaskiya.

Majalisar wakilan Nijeriya za ta yi zaman gaggawa kan jadawalin zaben 2027

Muhammad Jamil
-
0
Majalisar wakilan Nijeriya za ta yi zaman gaggawa kan jadawalin zaben 2027

Majalisar Wakilan Nijeriya za ta koma zama ranar Talata, 17 ga Fabrairu, domin tattauna batutuwan zabe da suka taso bayan sanar da jadawalin zaben 2027 da Hukumar Zabe Mai Zaman Kanta ta Kasa (INEC) ta fitar.

Shugaban INEC, Farfesa Joash Amupitan, ya sanar da cewa za a gudanar da zaben Shugaban Kasa da na Majalisar Tarayya ranar 20 ga Fabrairu, 2027, yayin da zaben gwamnoni da ‘yan majalisun jihohi zai gudana ranar 6 ga Maris, 2027, bisa tanadin kundin tsarin mulki da Dokar Zabe ta 2022.

Sanarwar zaman gaggawar ta fito ne ta hannun kakakin majalisar, Rep. Akin Rotimi Jr., wanda ya ce matakin na nuna kudurin majalisar na daukar mataki kan duk wani abu da ya shafi tsarin dimokuradiyya.

Haka kuma, Ofishin Kakakin Majalisar ya bayyana cewa zaman zai ba da damar sake duba kudirin gyaran dokar zabe, musamman batun rage wa’adin sanar da zabe daga kwanaki 360 zuwa 300, domin ba da sassauci wajen tsara ranakun zabe duba da cewa wasu daga cikin ranakun sun yi daidai da watan Ramadan.

Kotu ta sahale a binciko takardun karatun Ministan cikin gida na Nijeriya Olubunmi Tunji-Ojo

Muhammad Jamil
-
0
Kotu ta sahale a binciko takardun karatun Ministan cikin gida na Nijeriya Olubunmi Tunji-Ojo

Babbar Kotun Tarayya da ke Abuja ta amince da bukatar binciken ingancin takardar shaidar sakandare ta Ministan Harkokin Cikin Gida, Olubunmi Tunji-Ojo.

Mai shari’a Binta Nyako ce ta bayar da izinin bayan bukatar da wani mai fafutuka, Emorioloye Owolemi, ya shigar ta hannun lauyansa, SAN Philemon Yakubu, bisa Dokar ‘Yancin Samun Bayani ta 2011.

Bukatar na neman a binciki sahihancin takardar WAEC da ministan ya gabatar. Kotun ta amince da a ci gaba da sauraron shari’ar, inda ta sanya ranar 14 ga Maris domin ci gaba da zama kamar yadda jaridar Daily Trust ta ruwaito.

Sai dai wata kotun tarayya daban karkashin Mai shari’a Joyce Abdulmalik ta ki amincewa da wata bukata ta daban wadda ke neman binciken takardar kammala yi wa kasa hidima ta NYSC ta ministan.

A cikin waccan bukata, mai karar ya nemi a tilasta wa NYSC ta bayar da bayanai kan takardun hidimar ministan, ciki har da bayanan rajista da biyan alawus, amma kotun ta yi watsi da rokon.

NNPP ta bukaci Fadar Shugaban Nijeriya ta wanke Kwankwaso daga zargin tallafa wa ta’addanci

Muhammad Jamil
-
0
NNPP ta bukaci Fadar Shugaban Nijeriya ta wanke Kwankwaso daga zargin tallafa wa ta’addanci

Jam’iyyar NNPP reshen Kano ta bukaci Fadar Shugaban Nijeriya da Ofishin Mai Ba Shugaban Ƙasa Shawara kan Tsaro (NSA) su fito su wanke jagoranta na ƙasa, Rabiu Musa Kwankwaso, daga zargin da ake alakanta shi da tallafa wa ta’addanci.

A sanarwar da Sakataren Yada Labarai na jiha, Injiniya Ibrahim Karaye, ya sanya wa hannu, jam’iyyar ta nemi a fitar da bayani a hukumance domin kawar da abin da ta kira zarge-zarge marasa tushe.

NNPP ta bayyana Kwankwaso a matsayin ɗan Nijeriya mai kishin ƙasa, tana mai cewa tarihinsa a fannin ilimi da bunƙasa al’umma ya isa shaida. Ta kuma gargadi ‘yan siyasa da su guji amfani da batun tsaro a matsayin makamin takara.

Jam’iyyar ta roƙi gwamnatin tarayya da ofishin NSA su fayyace lamarin cikin gaggawa domin kauce wa abin da ta kira kunyatar da ƙasa da kuma yaɗuwar mummunar fahimta a idon duniya.

Kotu a Kano ta daure jarumar Kannywood Samha Inuwa watanni 6 a gidan gyaran hali

Muhammad Jamil
-
0
Kotu a Kano ta daure jarumar Kannywood Samha Inuwa watanni 6 a gidan gyaran hali

Alkalin Babbar Kotun Tarayya da ke Kano, Mai shari’a S.M. Shuaibu, ya yanke wa jarumar Kannywood, Saadatu Mohammed Inuwa wadda aka fi sani da Samha, hukuncin daurin watanni shida bisa laifin bata da wulakanta takardar Naira.

An gurfanar da ita ne kan tuhuma guda daya da ta shafi lalata kudin Nijeriya sabanin tanadin dokar Babban Bankin Nijeriya (CBN) ta 2007. Takardar tuhumar ta ce ta bata takardar N1,000 ta hanyar goge ta da hanci a shekarar 2022 a cikin hurumin kotun.

Jaridar Daily Nigerian ta ruwaito Samha M. Inuwa ta amsa laifin bayan an karanta mata tuhume-tuhumen, inda mai gabatar da kara, Musa Isah, ya roki kotu ta same ta da laifi tare da yanke mata hukunci.

Sai dai ta roki kotu ta yi mata sassauci, tana mai cewa wannan shi ne karon farko da ta aikata laifi kuma ta nuna nadama. Daga nan ne kotu ta yanke mata daurin watanni shida tare da zabin biyan tarar N200,000.

Ya kamata INEC ta sake duba ranakun zaben 2027 saboda azumin Ramadan – Bashir Ahmad

Muhammad Jamil
-
0
Ya kamata INEC ta sake duba ranakun zaben 2027 saboda azumin Ramadan – Bashir Ahmad

Tsohon hadimin shugaban Nijeriya, Bashir Ahmad, ya bukaci Hukumar Zabe Mai Zaman Kanta ta Kasa (INEC) ta sake nazarin ranakun da ta ayyana domin zaben 2027, yana mai cewa sun yi daidai da watan Ramadan wanda zai iya shafar halartar masu kada kuri’a Musulmi.

Kamar yadda aka sanar, INEC ta tsayar da 20 ga Fabrairu, 2027, domin zaben Shugaban Kasa da na Majalisar Tarayya, yayin da za a yi na gwamnoni da ‘yan majalisun jihohi ranar 6 ga Maris, 2027.

A sakon da ya wallafa a shafinsa na X, Ahmad ya ce wannan ra’ayi ne cikin girmamawa, yana mai cewa a watan Ramadan Musulmi kan fi mayar da hankali kan azumi da ibada, lamarin da ka iya rage shiga harkokin yau da kullum.

Ya kara da cewa duba da yawan Musulmi a Nijeriya, ya dace a yi la’akari da sauya lokaci domin tabbatar da cikakkiyar halartar jama’a da kuma karfafa hadin kai da shigar kowa a tsarin dimokuradiyya.

Hukumar NDLEA ta kama buhunnan tabar wiwi 64 a Kano

Muhammad Jamil
-
0
Hukumar NDLEA ta kama buhunnan tabar wiwi 64 a Kano

Hukumar Yaki da Sha da Fataucin Miyagun Kwayoyi (NDLEA) reshen Kano ta kama buhuna 64 na tabar wiwi da aka boye a cikin wata tirelar siminti a kan titin Kano–Zariya. Kakakin rundunar, ASN Sadiq Maigatari, ya ce an kama kayan ne ranar 2 ga Fabrairu, 2026, bayan samun bayanan sirri da sa ido na musamman.

Ya ce tirelar dauke da simintin Dangote ta taso daga Obajana a Jihar Kogi zuwa Mubi a Adamawa, kafin jami’ai su tsaida ta a kan titin Zariya–Kano. An kama direban motar, wanda ke hannun hukuma domin ci gaba da bincike.

Kwamandan NDLEA na Kano, D.Y. Lawal, ya ce an boye miyagun kwayoyin cikin kaya na halal, kuma ana zargin an shirya rarraba su ne a Kano gabanin watan Ramadan. Ya jaddada cewa ba za su bari masu fatauci su lalata al’umma ba.

Hukumar ta ce za ta kara tsaurara sintiri da bincike a fadin jihar, tare da bin diddigin wadanda ke da hannu a lamarin domin gurfanar da su a gaban kuliya. Ta kuma bukaci jama’a su rika bayar da bayanai kan duk wata alama ta fataucin miyagun kwayoyi.

Jonathan da Akume sun saba wa juna kan ka’idar shekarun shugabanci

Muhammad Jamil
-
0
Jonathan da Akume sun saba wa juna kan ka’idar shekarun shugabanci

Tsohon Shugaban Ƙasa, Goodluck Jonathan, ya bukaci Afirka ta bai wa matasa damar shugabanci, yana mai cewa shekaru 25 zuwa 50 sun fi dacewa da juriya da kuzarin zamani, inda ya ambaci Murtala Muhammed da Yakubu Gowon a matsayin shugabannin matasa masu tasiri.

Sai dai Sanata George Akume, wanda ya wakilci Shugaba Bola Tinubu, ya jaddada cewa shugabanci ba ya ta’allaka da shekaru, sai da hangen nesa da kwarewa, inda ya ce tasirin shugaba na fitowa ne daga tunani da iya aiki.

A taron da aka yi don tunawa da cika shekaru 50 da kisan Janar Murtala Muhammed, tsohon Shugaban Ƙasa Olusegun Obasanjo ya danganta koma bayan tattalin arzikin Nijeriya da sauya manufofi ba tare da dorewa ba, musamman shigo da shinkafa tun 1979.

Obasanjo ya yi kira ga Afirka da ta mayar da hankali kan gyare-gyare masu dorewa da karfafa samarwa domin samun ci gaba mai ma’ana.

INEC ta sanya 20 ga Fabrairu, 2027 a matsayin ranar zaɓen shugaban Nijeriya

Muhammad Jamil
-
0
INEC ta sanya 20 ga Fabrairu, 2027 a matsayin ranar zaɓen shugaban Nijeriya

Hukumar Zabe Mai Zaman Kanta ta Kasa (INEC) ta fitar da jadawalin babban zaben 2027, inda ta sanar da cewa za a gudanar da zaben Shugaban Kasa da na Majalisar Tarayya ranar 20 ga Fabrairu, 2027, yayin da zaben gwamnoni da ‘yan majalisun jihohi zai gudana ranar 6 ga Maris, 2027.

Shugaban INEC, Farfesa Joash Amupitan, ya bayyana hakan a wani taron manema labarai a Abuja, yana mai cewa hukumar ta shirya tsaf domin gudanar da zaben bisa tanadin kundin tsarin mulki da Dokar Zabe ta 2022.

Ya ce sanar da jadawalin ya dace da sharuddan doka da ke bukatar a fitar da sanarwar zabe akalla kwanaki 360 kafin ranar zabe, tare da jaddada cewa ikon sanya ranar zabe na hannun INEC ne kawai.

Hukumar ta kuma ce cikakken jadawalin ayyuka, ciki har da lokacin gudanar da zaben fidda gwani da fara yakin neman zabe, an wallafa su a shafinta, tare da umartar kwamishinonin zabe na jihohi 36 da na FCT su sanar da jama’a a mazabunsu.

1...212223...507Page 22 of 507

FOLLOW US

© DCL Hausa