Dan majalisar tarayya mai wakiltar mazabar Tambuwal/Kebbe a jihar Sokoto, Abdussamad Dasuki ya sanar da ficewarsa daga jam’iyyar PDP, inda ya koma ADC.

A cikin wasiƙar da ya aika wa shugaban PDP na mazabar Dogon Daji/Salah Ward a ƙaramar hukumar Tambuwal, mai ɗauke da kwanan wata 15 ga Maris, 2026, Dasuki ya ce rikicin shugabanci da ya daɗe yana addabar jam’iyyar ne ya sa ya yanke shawarar barin jam’iyyar.

Ya bayyana cewa matsalolin cikin gida na jam’iyyar sun raunana ƙarfin PDP wajen taka rawar da ta kamata a matsayin babbar jam’iyyar adawa a Nijeriya.

Dan majalisar ya ce ya ɗauki matakin ne bayan tattaunawa da abokan siyasarsa da kuma al’ummar mazabarsa, inda suka nuna damuwa kan halin da jam’iyyar da kuma ƙasar ke ciki.

Tsohon gwamnan jihar Sokoto kuma Sanata mai wakiltar Sokoto ta Arewa, Aliyu Magatakarda Wamakko, ya bayar da tallafin miliyan 10, ga mutane dubu 10 da kuma kayan sawa domin tallafa wa marayu da sauran masu ƙaramin ƙarfi kafin bikin Sallah.

Rahotanni sun ce an miƙa gudummawar ta hannun hukumar zakka ta jihar Sokoto, inda shugaban hukumar, Lawal Maidoki, ya karɓi kayan a birnin na Sokoto a ranar Asabar.

Sanatan ya bayyana cewa an tsara bayar da tallafin ne domin bai wa mutane kusan 10,000, musamman marayu, su samu damar yin bikin Sallah cikin farin ciki.

Shugaban Amurka, Donald Trump, ya ce har yanzu bai shirya yin wata yarjejeniya da Iran domin kawo karshen rikicin da ke kara tsananta tsakanin kasashen biyu ba.

TRT Afrika ta rawaito na Trump na bayyana haka ne yayin wata hira da gidan talabijin na NBC News, inda ya ce sharuddan da ake tattaunawa kansu a yanzu ba su kai matsayin da za su gamsar da shi ba.

Ya kuma kara da cewa wani muhimmin sharadi a duk wata yarjejeniyar shine Iran ta amince da daina shirinta na mallakar makaman nukiliya.

A cewarsa, Iran na son a kulla yarjejeniya, amma shi bai shirya amincewa ba har sai an cimma sharuddan da suka dace da bukatar su.

Gwamnan jihar Imo State, Hope Uzodimma, ya ce shugaban Nijeriya Bola Ahmed Tinubu ya kare ƙasar daga mummunan rikicin farashin mai da ya addabi kasashen duniya sakamakon rikicin Gabas ta Tsakiya, duk da cewa farashin litar mai ya kai kusan N1,300 a Nijeriya.

Jaridar Daily Trust ta ruwaito cewa Uzodimma ya bayyana hakan ne lokacin da ya karɓi baƙuncin wata tawaga ta kungiyar City Boy Movement a gidan gwamnati da ke Owerri a karshen mako.

Gwamnan ya ce rikicin da ya ɓarke tsakanin Iran, Israel da kuma Amurka ya haifar da tashin farashin mai a duniya, musamman bayan da aka samu matsala a mashigar jiragen ruwa ta Strait of Hormuz, wadda kusan kashi 20 cikin 100 na man fetur na duniya ke bi ta cikinta.

Duk da haka, Uzodimma ya ce sauye-sauyen tattalin arziki da gwamnatin Tinubu ta aiwatar sun taimaka wajen kauce wa karancin mai da kuma hauhawar farashi fiye da haka a cikin gida.

Hukumar ba da agajin gaggawa a Nijeriya NEMA ta karɓi ‘yan kasar 147 da suka dawo daga Jamhuriyar a filin jirgin sama na Malam Aminu Kano da ke Kano, a wani mataki na tallafawa ‘yan kasar da ke dawowa daga ƙasashen waje.

A wata sanarwa da ofishin NEMA na Kano ya wallafa a shafinsa na Facebook ranar Juma’a, hukumar ta ce ‘yan Nijeriya din sun iso daga birnin Niamey a ranar 5 ga Maris, 2026 da misalin karfe 12:19 na rana.

Sanarwar ta bayyana cewa an gudanar da aikin karɓar su ne tare da haɗin gwiwar wasu hukumomi da suka haɗa da Nigerian Red Cross Society, da kuma Nigeria Security and Civil Defence Corps.

Hukumar ta ce an gudanar da tantance bayanan mutanen da suka dawo a ranar 6 ga Maris, inda aka gano cewa cikinsu akwai maza manya 136, mata manya biyar, yara maza uku da kuma yara mata uku.

Gwamnatin Amurka na shirin tura karin sojoji da jiragen ruwan yaki zuwa yankin Gabas ta Tsakiya yayin da rikici da Iran ke kara tsananta, musamman a yankin.

TRT Afrika ta rawaito cewa ma’aikatar tsaron Amurka na duba yiwuwar tura karin jiragen yaki zuwa yankin domin tallafa wa rundunar da ke can.

Rahoton ya ce sakataren tsaro na Amurka, Pete Hegseth, ya amince da bukatar rundunar ta tura wani bangare na rundunar jiragen ruwa tare da rundunar United States Marine Corps, wadda yawanci ke dauke da jiragen yaki da kusan sojoji 5,000.

Rahoton ya kara da cewa jirgin yaki na ruwa USS Tripoli, wanda ke da sansani a Japan, tare da sojojin da ke cikinsa, sun riga sun nufi yankin Gabas ta Tsakiya domin karfafa rundunar Amurka.