Gwamnatin jihar Kaduna ta sanar da janye dokar hana fita bakidaya a jihar bayan zanga-zanga tsadar rayuwa da aka gudanar da ta rikide ta koma tarzoma a wasu yankunan jihar.

A cikin wata sanarwa daga Samuel Aruwan da ke kula da ma’aikatar tsaron cikin gida na jihar, ta ce dama garuruwan Zaria da Kaduna ne aka sanya dokar biyo bayan hargitsi da aka samu a yayin zanga-zangar tsadar rayuwa, amma an janye bayan samun rangwamen wannan lamari.

Kazalika, jihar Jigawa ma ta sanar da janye dokar hana fita din bakidaya a kananan hukumomi 8 na jihar da aka kakaba biyo bayan tashin tarzoma a yayin zanga-zangar tsadar rayuwa a jihar.

A cikin wata sanarwa da kwamishinan yada labaran jihar Sagir Musa ya fitar, ta ce kananan hukumomin da aka sanya wannan doka a baya su ne Kazaure, Birnin Kudu, Gumel, Hadejia, Kiyawa, Babura, Roni da babban birnin jihar, Dutse.

Jihar Kano ma ta sanar da janye wannan doka bakidaya kamar yadda Gwamnan jihar Abba Kabir Yusuf ya sanar.

Gwamnatin jihar ta ce ta yanke shawarar janye dokar ne biyo bayan samun rahotannin ingancin tsaro a sassan da aka samu rahotannin tashin hankali a yayin zanga-zangar tsadar rayuwa.

 Tsohon dan takarar shugaban kasa na jam’iyyar Labour a zaben 2023, Peter Obi ya nuna bakin cikinsa kan yadda aka samu asarar rayuka a lokacin zanga-zangar adawa da tsadar rayuwa.

Peter Obi ya yi alhinin ne a shafinsa na X a ranar Lahadi.

Ya ce, “A yayin da zanga-zangar adawa ta tsadar rayuwa ta kammala a hukumance a jiya, ina so in sake mika sakon ta’aziyyata ga duk wadanda suka rasa rayukansu, ciki har da jami’an tsaro a yayin wannan zanga-zan

gar.

 SERAP na son a binciki gwamnoni yadda suka yi da bashin da suka ci daga bankin duniya

Kungiyar SERAP ta bukaci shugaban Nijeriya Bola Tinubu, da ya umurci babban lauyan tarayya kuma Ministan Shari’a, Lateef Fagbemi (SAN) da sauran hukumomin da ke yaki da cin hanci da rashawa su yi gaggawar gudanar da bincike kan yadda gwamnonin kasar suka kashe kudaden da suka kai dala bilyan $1.5bn sa suka amso lamunin Bankin Duniya don rage talauci da kare lafiyar jama’a a fadin jihohin.

 Ba mu samu umurnin biyan N70,000 ga masu bautar kasa ba – Hukumar NYSC 

Hukumar da ke kula da matasa masu yi wa kasa hidima NYSC ta ce har yanzu ba su samu umurnin kan ko za su biya ‘yan bautar kasa mafi karancin albashi na N70,000.

Hukumar NYSC ta bayyana hakan ne a cikin wata sanarwa da Daraktan yada labarai da hulda da jama’a Mista Eddy Megwa ya fitar ranar Lahadi a Abuja.

Gwamnatin Nijeriya dai ta riga ta sanar da N70,000 a matsayin mafi karancin abin da za a iya biyan karamin ma’aikaci a fadin kasar.

 Matasa za su ci moriyar gwamnatin Tinubu – Shettima 

Mataimakin shugaban kasa, Kashim Shettima, ya jaddada kudirin gwamnatin shugaba Bola Tinubu na tallafawa da karfafawa matasa ‘yan Najeriya kwarin guiwa wajen yin fice a sana’o’in da suka zaba.

 A cewarsa, shugaban kasa yana mutunta matasan Najeriya, kuma jajircewarsa na bayyana a cikin nade-naden mukaman da ya yi da kuma manufofin gwamnati da tsare-tsare irin su asusun zuba jari na matasa, iDICE Programme, da bankin raya matasa na kasa da dai sauransu.

 Mataimakin shugaban kasar ya yi wannan jawabi ne a ranar Juma’a a lokacin da ya karbi bakuncin shugabannin kungiyar matasan jam’iyyar APC, karkashin jagorancin shugaban matasan jam’iyyar na kasa Dayo Israel, a ziyarar ban girma da suka kai fadar shugaban kasa.

 Atiku ya yi takaicin yadda wasu ke yunkurin dakile matatar Dangote 

Tsohon mataimakin shugaban kasa Atiku Abubakar ya yi fatali da yunkurin dakile ci gaban matatar man Dangote.

A wani sakon da ya fitar ta hanyar X a ranar Asabar, Atiku ya bayyana matatar a matsayin wani muhimmin aiki na kamfanoni masu zaman kansu.

Ya bukaci ‘yan Nijeriya da su tabbatar da cewa babu wani daga gida ko waje sa za a hada kai da su don hana kasar cin moriyar matatar m

an ba.

 An sake sassauta dokar hana fita a Jos jihar Plateau 

Gwamnatin jihar Filato ta sassauta dokar hana fita ta sa’o’i 24 da ta kafa a Jos babban birnin jihar, wanda zai ba da damar zirga-zirga daga karfe 10 na safe zuwa 6 na yamma.