Gwamnatin Tarayya ta ba da tabbacin cewa za a warware matsalolin da zasu sa a gudanar da zanga-zangar da ake shirin yi a fadin kasar.

Wasu kungiyoyi da daidaikun jama’a ne zasu gudanar da zanga-zangar a fadin kasar a ranar 1 ga watan Agusta domin kawo karshen tsadar rayuwa a kasar.

Sakataren gwamnatin tarayya, George Akume a ranar Laraba ya yi wata ganawar sirri da ministoci kan baton.

Da yake jawabi bayan taron, Ministan yada labarai da wayar da kan jama’a, Mohammed Idris, ya ce babu wanda zai bacci a tsakaninsu har sai an warware matsalolin.

Idris ya ce gwamnati ta kasance tana tattaunawa da masu ruwa da tsaki da sauran masu shirya zanga-zangar da ake shirin yi a fadin kasar.

Kungiyar daliban Najeriya ta gargadi shugabannin makarantun kasar kan karin kudin makaranta sakamakon matakin da gwamnatin tarayya ta dauka na baiwa dalibai rancen kudi.

Wannan gargadin na kunshe ne a cikin wata sanarwar bayan taro na da kungiyar ta fitar a Kano, ranar Laraba wanda Kwamared Okunomo Adewumi ya sakama hannun.

“Duk wata cibiya da aka samu ta kara kudi ba gaira ba dalili, za ta fuskanci fushin Kungiyar dalibai, za mu hada kan mambobinmu tare da daukar kwakkwaran mataki”.

Kashim Shettima ya kaddamar da wasu ayyuka a jigawa, ya kuma bukaci matasa su gujewa shiga zanga-zanga

Mataimakin shugaban kasa Kashim Shettima ya ziyarci jihar Jigawa a ranar Talata domin kaddamar da wasu ayyuka da ofishin sa ya jagoranta. A yayin ziyarar tasa, Shettima ya bukaci matasan da su kaurace wa shiga zanga-zanga, inda ya bayyana cewa, ba za ta haifar da ci gaba mai kyau ba, kuma za ta iya haifar da tashin hankali da asarar dukiyoyin jama’a.

Ya jaddada cewa gwamnatin su karkashin shugaban kasa Bola Ahmed Tinubu tana aiki tukuru wajen aiwatar da manufofi da shirye-shirye da nufin inganta rayuwar ‘yan Nijeriya.

Mataimakin shugaban kasar ya kuma yabawa gwamna Malam Umar Namadi bisa bullo da tsare-tsare masu da zasu inganta rayuwar al’ummar Jigawa.

Gwamna Namadi ya bayyan ziyarar mataimakin shugaban kasar a matsayin wadda tazo da alheri da amfani mai tarin yawa ga al’ummar jihar Jigawa.

Yace mataimakin Shugaban kasa ya kaddamar da asibitocin MSME don inganta harkokin lafiya, kasuwanci da bunkasa kanana da matsakaitan masana’antu. Ya kuma kaddamar da shirin noman rani mai amfani da hasken rana mai fadin hekta 20,000.

Sauran ayyukan sun hada da kaddamar da samar da wutar lantarki mai ta hasken rana mai karfin KVA 100 domin samar da tsayayyar wutar lantarki ga masu kananan sana’o’i a kasuwannin Dutse, da kaddamar da shirin horas da matasa 1,000 daga jihar Jigawa kan sabuwar fasahar zamani ta Artificial intelligence (AI).

Gwamna Namadi ya ce mun yi farin ciki da cewa wannan ya yi daidai da ajandarmu ta inganta rayuwar al’ummar Jigawa, inda muke shirin aiwatar da tsare-tsare masu inganci don tallafawa da inganta harkokin kasuwanci, sana’o’i, da bunkasa kananan ‘yan kasuwa.

Zanga-zanga ba zata magance kalubalen dake Nijeriya ba– Gwamna Namadi

Gwamnan jihar Jigawa Umar Namadi ranar ya ce zanga-zangar da ake shirin yi a fadin kasar a ranar 1 ga watan Agusta, ba ita ce mafita ga kalubalen da Nijeriya ke fuskanta a halin yanzu ba.

Gwamnan ya bayyana hakanne a wani taro da aka yi da kungiyoyi 27 da ya gudana ranar litinin a birnin Dutse.

Namadi yace tabbas Nijeriya na fama da tabarbarewar tattalin arziki da rashin tabbas

Amma, zanga-zangar ba ita ce mafita ba. Akwai hanyoyi da dama da mutane za su iya bayyana kokensu, mutane suna da ‘yancin nuna korafe-korafensu ta hanyar zanga-zangar karkashin mulkin dimokradiyya, amma wannan ba ita ce hanya mafi inganci don magance matsalolin ba.

Yace zanga-zanga kadai ba za ta samar da mafita ba, jama’a su koma ga Allah, su tuba, su nemi gafara da sa hannun Ubangiji kan kalubalen da kasa ke ciki.

Namadi ya ce gwamnati ta yi iyakacin kokarinta ta fuskar samar da kayan abinci da sauran kayayyaki da suka hada da raba kudade domin rage wahalhalun da jama’a suke fuskanta a dukkan matakan gwamnati.

Gwamnan ya kuma tunatar da jama’a cewa a kwanakin baya ne gwamnatin tarayya ta amince da shigo da kayan abinci cikin kasar na tsawon watanni biyar ba tare da harajin shigo da kaya daga kasashen waje ba.

Namadi ya shawarci ‘yan Nijeriya da su yarda da wahalhalu a matsayin jarabawa daga Allah, ya kara da cewa kowane musulmi yasan kaddara ko mai kyau ko mara kyau don haka al’umma su cigaba da addu’ar samun sauki ga kasa.