Dan takarar shugaban Najeriya karkashin
Inuwar jam’iyyar PDP Alhaji Atiku Abubakar ya sake jadadda watsin da ya yi da
hukuncin kotun sauraren kararrakin zabe, da ya tabbatar da Bola Tinubu a matsayin
halastaccen shugaban kasar.

Yayin wani taron manema labarai
da ya yi da yammacin yau a birnin tarayya Abuja, Atiku Abubakar ya ce “Yakin
bai kare ba” a cewar sa babu wata-wata zai garzaya zuwa kotun koli.

A wajen taron manema labaran, Atiku Abubakar ya fito karara ya
bukaci lauyoyinsa da su yi gaggawar shigar da kara kotun koli sannan su fara
tattara hujjoji.

“ Ni ba bakon shari’a bane, don haka taron
lauyoyi da babaken dogayen riguna ba zai razana ni ba, kuma idan ka bi tarihin
siyasa ta na kasance dan gwagwarmaya da bana barin ta kwana, don haka zan yi
duk mai yiwuwa don kwato abinda dama nawa ne a gaban shari’a” inji Atiku
Abubakar.

Atikun ya kuma ci gaba da cewa wannan yakin ba
don biyan bukatun sa dari bisa dari yake yi ba, a’a don tilastawa hukumar zaben
kasa mai zaman kanta INEC ta daidaita sahun ta, ta kuma gane cewa kotu tana da
karfin tayar da hukuncin zalunci da ta yanke.

Hukumar jin dadin Alhazai ta Nijeriya  NAHCON ta bukaci maniyyata da ke son gudanar da ibadar aikin Hajj a shekarar 2024 da su saka mafi karanci kudin da suka kai Naira miliyan 4.5,  inda ta bayyana cewa aikin hajji mai zuwa zai yi tsada.

Shugaban Hukumar NAHCON, kuma Babban Jami’in Hukumar, Alhaji Zikrullah Kunle Hassan, wanda ya bayyana haka a lokacin da yake zantawa da manema labarai jiya Talata a Abuja

Hukumar ta kuma yi nuni da cewa ana duba rahotannin kwamitocin na aikin Hajjin bana na 2023 da ya gudana.

Ya ce tuni hukumar ta fara kaddamar da shirye-shiryen domin tunkarar yadda za a yi aikace-aikacen maniyyata da ke son yin Aikin Hajjin shekarar 2024

Alkalin Babban Kotun Jihar Kano Mallam Usman Na’abba ya jingine dakatarwar da jam’iyyar NNPP tsagin Dr. Boniface Aniebonam ta yi wa tsohon gwamnan Kano Dr. Rabi’u Musa Kwankwaso. Kazalika alkalin kotun ya dakatar da Dr. Boniface da ‘yan tawagarsa daga bayyana kansu a matsayin shugabannin jam’iyyar har sai an kammala shari’a. Alkali Usman Na’abba ya kuma bukaci hukumar zabe ta INEC da ka da ta yi mu’amula da wadannan mutane a matsayin shugabannin jam’iyyar NNPP.

Wannan hukuncin dai ya biyo bayan karar da aka shigar a gaban kotun ne bayan dakatarwar da su Dr. Boniface din suka yi wa Kwankwaso a ranar 29.08.2023. Sai dai kuma jaridar Punch wacce ta ruwaito wannan labari na jingine dakatarwar Kwankwaso ba ta bayyana ko matakin ya shafi korar da shugabannin na NNPP suka yi wa jagoran Kwankwasiyya daga jam’iyyar a wannan Talata ba. A ranar 05.10.2023 kotun za ta ci gaba da sauraran wannan kara da ke a gabanta.

 Jami’an tsaro a birnin
Tamale na arewacin Ghana sun kama wasu ‘yan sanda guda biyu da laifin sace
babur din wasu ‘yuan fashi da aka kama.

Tun farko ‘yan sandan sun
sacewa wasu ‘yan fashi babur din ne bayan da bude wuta a dai-dai lokacin da
wata kotu take gab da yanke hukuncin fashi da makami da ake zargin abokin su da
aikatawa.

Tuni dai aka tsare yan sandan biyu da suka
hadar da Lance Copral Muhammad Aboagye da Sergent Elvis Emmanule, inda kuma aka
bude kundin bincike akan su.

A bincike farko-farko da jami’an tsaro suka
gudanar sun gano cewa dai-dai lokacin da ‘yan sandan ke musayar wuta da mutanen
bayan sun bude wa kotun wuta, a lokacin ne su kuma ‘yan sandan suka zagaya
bayan kotun inda masu laifin suka ajiye ababen hawan su ba tare da wata-wata ba
kuma suka yi awon gaba da mashin din.

Bayan bincike da kama mutanen 13 ne kuma suka
gane mashin din su a lokacin da ake hole su a shalkawatar rundunar ‘yan sandan kasar,
kuma ba tare da bata lokaci ba, suka shaidawa jami’an tsaro cewa wannan shine
mashin din su da aka sace.

Jaridar Ghanian Times ta ruwaito cewa tuni aka
adana mashin din a shalkawatar rundunar ‘yan sandan kasar, yayin da aka fara bincike
don gano sauran Babura 3 da ‘yan fashin suka ce an sace musu.

Hukumar tsaron sirri ta DSS a Najeriya ta sanar da kama wasu mutane
da hannu a karkatar da kayayyakin abincin da gwamnatin tarayya ta samar don
rabawa jama’a.

Hukumar ta ce duka mutanen da ta kama jami’an hukumar bayar da
agajin gaggawa na kasa NEMA ne, kuma mafi yawan su an kama su ne a kasuwar
Lafia da ke jihar Nasarawa lokacin da suke tsaka da sayar da kayan ga ‘yan
kasuwa.

Mai Magana da yawun hukumar Peter Afunanya
ya ce tuni aka kamo wasu kayayyakin da mutanen suke yunkurin sayarwa.

Afunanya ya kuma bukaci jama’ar Najeriya da su
sanya idanu sossai kan masu sayar da kayan abinci don basu rahoton masu sayar
da kayan da gwamnati ta tanadar don rabawa jama’a a kyauta.

Haka kuma hukumar ta ce ta kama wasu mutanen na
daban wadanda sune suke shirya yadda za’a sace kayan kafin ma a kai su kasuwa.

Jam’iyyar NNPP ta sanar da korar jagoranta Injiniya Rabi’u Musa Kwankwaso bayan da ta dakatar da shi makonni uku da suka gabata, sakamakon zargin sa da yiwa jam’iyyar zagon kasa tun bayan kammala babban zaben kasar.

Gidan rediyon Faransa, RFI Hausa, ya ce korar  ta Kwankwason na cikin wata sanarwa da jam’iyyar ta fitar dauke da sa hannun sakataren yada labaranta na kasa Abdulsalam Abdulrasaq.

Wannan dai na zuwa ne kasa da kwanaki uku bayan da wani tsagi na jam’iyyar ya sha alwashin gurfanar da tsohon gwamnan Kanon da wasu mabiyan sa a gaban shari’a, sakamakon zargin wadaka da fiye da naira biliyan 1 da aka tara a asusun jam’iyyar na kudaden sayar da fam din ‘yan Takara.

Sanarwar ta Abdulrasaq ta kuma kara da cewa korar kwanwason zata fara aiki ne nan take, yayin da yayi karin hasken cewa an dauki matakin ne bayan da Kwankwason ya ki bayyana a gaban kwamitin ladabtarwa na jam’iyyar, sakamakon gayyatar sa da aka yi don amsa wasu tambayoyi. 

Sakataren yada labaran jam’iyyar ya kuma tabbatar da cewa korar Rabi’u Kwankwaso na da goyon baya a cikin kundin jam’iyyar na shekarar 2022.

To sai dai da yake jam’iyyar ta rabu gida biyu kan matakin korar ta Kwankwaso, guda daga cikin masu goyon bayan sa kuma mai bincken kudi na jam’iyyar Ladipo Johnson yace bangaren da suka kori Kwankwason basu da alkibla kwata-kwata.

Bankuna da hukumomin gwamnati da ke biyayya ga kungiyar
kwadago ta NLC a Najeriya sun kauracewa guraren ayyukan su, yayin da yajin aikin
ya doshi sa’o’I 24.

Kamfanin dillancin labaran Najeriya NLC ya ruwaito
cewa baki daya bankuna basu yi aiki a fadin kasar ba, yayin da wasu daga cikin
ma’aikatun gwamnati suka fita aiki wasu kuma suka zauna a gida.

Tun farko dai kungiyar NLC ce ta kuduri aniyar tafiya yajin
aikin na kwanaki biyu don nunawa gwamnatin kasar bacin ranta a game da rashin
mayar da tallafin man fetur da ya haddasa tsadar rayuwa.

A cikin sanarwar da kungiyar ta fitar ta ce zata kuma tsunduma
wani yajin aikin na sai baba ta gani nan da makonni biyu masu zuwa matukar
gwamnati bata dauki matakin gyara bayan wannan yajin aikin da suka aiwatar ba.

DCL Hausa ta gano yadda mambobin na kungiyar NLC suka kulle
kofofin shiga gidan talabijin din NTA na kasa da na Radio don hana ma’aikata shiga.

To amma dai masana a kasar na ganin zai yi wuya
wannan yajin aikin yayi tasiri la’akari da barakar da ke tsakanin kungiyoyin
kwadago guda biyu na NLC da TUC, kasancewar TUC ta barranta kanta da mambobin
ta daga wannan yajin aiki.