.jpg)
Dakataccen
kwamishinan zaben jihar Adamawa Barista Hudu Ari ya maka kungiyar lauyoyi ta kasar
a gaban kotu bayan kishin-kishin din da suke yi na sake gurfanar da shi a gaban kotu.
Ari
na wannan barazana ne, bayan da kungiyar ta NBA ta fara yunkurin sake gurfanar da shi a gaban kotu kan
zargin yunkurin karkatar da sakamakon zabe, bayan karbar na goro.
A cewar
Ari babu wata hujja da kungiyar ta ke da ita na sake gurfanar da shi a gaban
kotu, kasancewar waccan kotun da aka kai shi ta bada umarnin a tsaya a inda ake
har sai ta kammala binciken da ta ke yi.
Ari ya ci gaba da cewa tsageranci ne ga
kotu idan suka sake gurfanar da shi kan laifi guda, don haka ya bukace su da
kada su kuskura su fara, matukar ba haka ba kuma ta tabbata suma basa mutunta
aiki su.
Tun farko dai ana zargin
Yunusa Ari da ayyana Aisha Binani a matsayin wadda ta lashe zaben gwamnan jihar
Adamawa alhali ba’a ma kammala girka sakamakon zabe ba, dalilin da ya sa aka
rika yada jita-jitar cewa ya karbi cin hancin kudade har naira biliyan guda.
Wannan dalili ne ya
sa hukumar zabe mai zaman kanta ta Najeriya ta sanar da dakatar da shi daga
aikin sa sannan kuma aka gurfanar da shi a gaban kotu, sai dai kuma fara shari’ar
ke da wuya kotu ta bukaci a dakata har sai an kammala bincike.
Tsohon shugaban
Najeriya Abdulsalam Abubakar ya sanar da mikawa shugaban kasar Bola Ahmad
Tinubu rahoto kan batutuwan da suka tattauna yayin ziyarar tawagar da ya
jagoranta zuwa jamhuriyar Nijar.
Da yake zantawa da manema labarai jim kadan bayan
kammala ganawar sa da shugaban kasa, Abdulsalam Abubakar ya ce dukkanin alamu
sun nuna cewa yaki ba zai shawo kan al’amarin ba, a maimakon haka kamata ya yi
a rungumi tattaunawar diplomasiyya.
Ganawar ta su ta sami halarcin shugaban majalisar
zartaswar kungiyar ECOWAS Dr Omar Touray da kuma babban mai baiwa shugaban
Najeriya shawara kan harkokin yada labarai Malam Nuhu Ribadu.
Bayan kammala ganawar ta su, shugaban Najeriya Tinubu
wanda kuma shine shugaban ECOWAS ya sha alwashin yiwa rahoton Nazari na tsanaki,
kafin daga bisani kuma a san matakin da za’a dauka.
Wannan dai na zuwa ne a dai-dai lokacin da ECOWAS ta
sanar da cewa ta gama duk wani shiri na fadawa Nijar da yaki.
Rundunar sojin Najeriya karkashin Operation Hadin kai sun sanar
da ceto karin dalibar Chibok guda daya.
Dalibar na cikin daliban Chibok 276 da ‘yan Boko Haram suka yi
garkuwa da su a ranar 14 ga watan Afrilun 2014 a cikin makarantar su da ke
kauyen Chibok na jihar Borno.
Rahotanni daga Jamhuriyar Nijar na cewa manyan motocin
daukar kaya fiye da 300 daga Burkina Faso sun isa birnin Niamey a kokarin da kasar ke yi na ragewa yan Nijar radadin takunkuman da aka Sanya musu.
Wannan na zuwa ne a dai-dai lokacin da kasashen Benin da
Najeriya manyan kasashen da ake shigar da abinci jamhuriyar Nijar suka rufe
iyakar su da kasar wadda ke karkashin juyin Mulki.
Tun bayan juyin mulkin na
Nijar ta ke samun goyon bayan gwamnatin kasashen Burkina Faso da Mali, abinda masana
ke ganin hakan yana da alaka da kasasancewar su sojoji.
Bayanai sun ce motocin makare
da kayan abincin sun sami rakiyar sojojin Burkina Faso, kafin daga bisani suka
mikasu hannun sojojin Nijar akan iyakar kasashen biyu.
Ko da yake jawabi daraktan
hukumar hana fasa kwauri ta jamhuriyar Nijar Kanal Adamou Zaraoumeye yace hukumar
sa ta karbi motoci guda 300 makare da kayan abinci da suka hadar da masara da
gishiri da sauran kayan masarufi.
A cewar sa nan ba da jimawa
ba za’a far araba ayan ga jama’ar kasar da nufin rage musu radadi.
Kungiyar tarayyar Africa ta sanar da korar
jamhuriyar Nijar daga cikin ta, abinda ke zama wani hukunci na baya-bayan nan
da aka yankewa Nijar bayan juyin Mulkin watan jiya.
Bayan taron kungiyar na yau Talata a
birnin Addis Ababa, kungiyar ta ce daukar wannan mataki ya zama wajibi la’akari
da yadda sojojin na Nijar suka ki bada hadin kan da ya dace a game da
tattaunawar Diplomasiyya.
Matakin na AU na zuwa ne bayan da tuni
ECOWAS da wasu kungiyoyin kasashen ketare suka sanar da kakabawa Nijar din
takunkumai, wadanda tuni suka fara tasiri a kanta.
Sai dai kuma masana na ganin
cire Nijar daga cikin AU ba zai yi mata wani tasiri ba, la’akari da yadda kungiyar
ke zama tamkar dai ‘yar amshin shatan kasashen yamma a wasu lokutan.
Bayan wannan
mataki, kungiyar ta AU ta kuma ce zata bibiyi irin matakan da kungiyar ECOWAS
ko CDEAO ta dauka kan jamhuriyar Nijar, don ganin ta inda ya kamata ta kara
shiga da nufin kara matsa lamba ga sojojin na Nijar.
© DCL Hausa