Wannan na kunshe ne a cikin wata sanarwa da kwamitin ba da shawara kan harkokin addini, tare da haɗin gwiwar kwamitin duban wata suka fitar a ranar Asabar, 20 ga Disamba, 2025.

Sanarwar ta bayyana cewa ba a samu rahoton ganin jinjirin watan Rajab ba daga ko ina a fadin Nijeriya a daren Asabar wanda ya yi daidai da 29 ga watan Jumada Sani, don haka watan ya cika kwana 30.

Sakamakon haka, Mai alfarma Sarkin Musulmi, Alhaji Muhammad Sa’ad Abubakar, ya amince da rahoton tare da ayyana Litinin a matsayin 1 ga watan Rajab.

Jam’iyyar PDP reshen jihar Jigawa ta nuna rashin jin daɗi kan matakin dakatar da Sule Lamido, CON, daga ayyukan kwamitin amintattu na jam’iyyar,tana mai kira da a gaggauta janye hukuncin.

A wata sanarwa da shugaban PDP na Jigawa, Babandi Ibrahim Gumel, ya fitar, jam’iyyar ta bayyana dakatarwar a matsayin rashin adalci,kuma hakan zai ƙara rarraba kan jam’iyya, musamman a lokacin da ake buƙatar haɗin kai domin fuskantar jam’iyyar APC mai mulki.

Ya ce zargin da aka jingina wa tsohon gwamnan na halartar wasu tarurruka da ake ganin barazana ne ga haɗin kan jam’iyyar ba hujja ba ce, domin Lamido ya yi abin da doka da kundin tsarin mulki suka ba shi dama.

Kwamandan rundunar sojin Nijeriya ta Guwards Brigade , Birgediya Janar Adebisi Onasanya, ya gargaɗi ’yan bindiga da sauran masu aikata laifuka a Abuja da sauran wurare cewa za su dandana kudarsu a shekarar 2026, domin za a ƙara matsa musu lamba ta fuskar tsaro.

Janar Onasanya ya bayyana hakan ne a Abuja a ranar Asabar, yayin ganawa da manema labarai a Aso Rock.

Ya bayyana cewa shekarar 2025 ta kasance mai matuƙar ƙalubale, sakamakon ƙarin buƙatun tsaurara tsaro fiye da aikin kare shugabanni kaɗai.

A cewarsa, rundunar ta tsabtace yankuna a wurare daban daban a Abuja da wasu sassan jihar Neja, inda aka kama masu laifi, aka kwato makamai, tare wasu ’yan ta’adda,ya ce nasarorin sun samu ne ta hanyar haɗin gwiwa da ’yan sanda, NSCDC, DSS, da kuma goyon bayan sojin ruwa da sojin sama.

Ministan sadarwa Dr. Bosun Tijani, ya ce shugaba Bola Ahmed Tinubu na aiki tukuru domin gina rayuwar matasa, al’umma da kuma makomar ƙasar baki ɗaya.

Dr. Tijani ya bayyana hakan ne a ranar Juma’a yayin buɗe gasar kwallon kwando ta matasa daya gudana a babban birnin jihar Ogun.

Ministan ya ce gasar, wadda ta zo daidai da bukukuwan ƙarshen shekara, an tsara ta ne domin samar da nishaɗi da haɗin kai, inda matasa za su haɗu, tare da kulla alaƙa mai ɗorewa ta hanyar aiki tare.

Ya ce, idan aka tallafa wa matasa a irin waɗannan wurare, suna bayyana basirarsu ba kawai a wasanni ba, har ma a matsayin shugabanni da masu ba da gudummawa ga al’umma.

Ya kara da cewa irin wadannan abubuwa sun yi daidai da manufar shugaba Tinubu na gina makomar matasan Nijeriya.

Gwamnan jihar Abia, Dr. Alex Otti, ya jaddada cewa zai yi ritaya daga siyasa bayan kammala wa’adinsa a matsayin gwamna, yana mai cewa baya da burin neman shugabancin Nijeriya, mataimakin shugaba ko Sanata a nan gaba.

Dr. Otti ya bayyana hakan ne a ranar Juma’a a fadar gwamnatin jihar, yayin da yake mayar da martani a wani bidiyo da ya karade kafafen sada zumunta, bayan ziyararsa ga Nnamdi Kanu a gidan gyaran hali na Sokoto.

Ya ce ya fada a baya kuma yanzu nana maimaitawa bayan ya gama wa’adinsa na gwamna, zan yi ritaya, ba zai kara neman wata takara ba.