Gwamnatin Ghana ta yi Allah-wadai da juyin mulkin da sojoji suka yi a Guinea-Bissau, tana mai bayyana shi a matsayin karɓar mulki ta hanyar saba wa doka da kuma barazana ga dimokuraɗiyya a Yammacin Afirka.

A wata sanarwa da ma’aikatar harkokin wajen kasar ta fitar ranar 26 ga Nuwamban 2025, hukumomin Ghana sun ce juyin mulkin ya lalata tsarin siyasa bayan kammala zaben shugaban ƙasa da na majalisar dokoki da aka yi ranar 23 ga Nuwamba.

Rahotanni sun ce wannan juyin mulki ya dakile sanar da sakamakon zaben da aka shirya fitarwa ranar 27 ga Nuwamba.

Ghana ta nuna tsananin damuwa da bacin rai, tana mai kiran abin a matsayin yunƙurin take muradun jama’ar Guinea-Bissau, inda ta nemi a gaggauta dawo da mulkin dimukradiyya, tare da kira ga duk bangarorin ƙasar su mutunta tsarin dimokuraɗiyyar.

Gwamnatin Nijeriya ta yi Allah-wadai da juyin mulkin da sojoji suka yi a Guinea-Bissau, tana mai cewa hakan barazana ce ga dimokuraɗiyya da zaman lafiyar yankin Yammacin Afirka.

A wata sanarwa da mai magana da yawun ma’aikatar harkokin kasashen waje Kimiebi Ebienfa ya fitar a Alhamis din nan, gwamnatin ta ce ta samu labarin juyin mulkin kuma hakan na da matuƙar takaici da damuwa.

Sanarwar ta ce Nijeriya ba ta amince da wannan abu da ke ruguza da tsarin mulki da ci gaban dimokuraɗiyya ba, kuma ba iya a Guinea-Bissau kawai ba, har ma a yankin ECOWAS gaba ɗaya.

Gwamnatin ta ƙara da cewa wannan mataki ya karya ka’idar ECOWAS wanda ta yi kan dimokuraɗiyya da kyakkyawan mulki, tare da haramta karɓar mulki ta hanyar da ba ta dace ba.

Sanatoci da dama sun nuna damuwa kan umarnin Shugaba Tinubu na janye jami’an ’yan sanda daga tsaron manyan mutane, suna cewa matakin na iya barin su cikin barazanar tsaro.

Sanatocin sun bayyana wannan damuwar ne a zaman majalisar ranar Laraba yayin tattaunawa kan tabarbarewar tsaro, bayan gabatar da kudiri daga Sanata Oyelola Yisa Ashiru kan bukatar gaggawar duba lamarin daga gwamnatin tarayya.

Shugaba Tinubu ya bayar da umarnin a janye jami’an daga tsaron manyan mutane domin mayar da su kan ayyukan su na asali, lamarin da ya janyo cece-kuce a majalisar dattawa da ta wakilai.

A lokacin muhawarar, Sanata Aliyu Magatakarda Wamakko ya ce wannan mataki bai dace ba a lokacin da hare-haren ’yan bindiga ke karuwa, yana mai cewa jami’an gwamnati na daga cikin manyan da ke bukatar tsaro.

Shi ma Sanata Tahir Monguno daga Borno ya ce janye ‘yansandan daga jami’an gwamnati zai kara mayar da su abin hari, ganin yadda yanayin tsaro ke tabarbarewa a sassan kasar.

Akalla mutane 20 ne wadanda suka kunshi manoma, mata masu juna biyu da kuma yara ‘yan bindiga suka yi garkuwa da su a kauyen Unguwan Kawo da ke yankin Erena da ke karamar hukumar Shiroro a jihar Neja.

Mazauna yankin sun ce lamarin ya faru ne da misalin karfe 4 na yammacin Laraba, 26 ga Nuwamba, a lokacin da manoman ke girbin shinkafa.

A cewar wani mazaunin garin da ya nemi a sakaya sunansa yace dansa na ɗaya daga cikin wadanda aka yi garkuwa da su, inda ya ce gonar da abin ya faru tana da tazarar kimanin mita 500 ne kacal da Erena, inda sansanin sojoji yake.

Lamarin ya faru ne kwanaki shida bayan sace dalibai da malamai sama da 200 daga makarantar St. Mary a Papiri, Karamar Hukumar Agwara.

Jaridar Daily Trust ta ruwaito cewa da aka tuntubi mai magana da yawun rundunar ‘yan sandan jihar, SP Wasiu Abiodun, ya ce zai bincika tare da tabbatar da sahihan bayanai nan gaba kadan.

Shugaba Tinubu ya tura sunayen mutane uku ga majalisar dattawa domin tantancewa a matsayin jakadu na Nijeriya a wasu kasashen waje.

Shugaban majalisar dattawan Sanata Godswill Akpabio ne ya karanta wasikar a zaman majalisar na ranar Laraba, inda ya bayyana cewa jerin sunayen farko ya kunshi mutum uku ne kawai.

A cewar Akpabio, sunayen da shugaban kasa ya aika sun hada da Kayode Are daga jihar Ogun, Aminu Dalhatu daga jihar Jigawa sai Ayodele Oke daga jihar Oyo.

Wannan matakin dai na zuwa ne yayin da gwamnati ke ci gaba da cike guraben diflomasiyya da suka yi saura tun bayan rushe sunayen wadancan jakadu a farkon mulkin Tinubu.