Shugaba Tinubu ya tura sunayen mutane uku ga majalisar dattawa domin tantancewa a matsayin jakadu na Nijeriya a wasu kasashen waje.

Shugaban majalisar dattawan Sanata Godswill Akpabio ne ya karanta wasikar a zaman majalisar na ranar Laraba, inda ya bayyana cewa jerin sunayen farko ya kunshi mutum uku ne kawai.

A cewar Akpabio, sunayen da shugaban kasa ya aika sun hada da Kayode Are daga jihar Ogun, Aminu Dalhatu daga jihar Jigawa sai Ayodele Oke daga jihar Oyo.

Wannan matakin dai na zuwa ne yayin da gwamnati ke ci gaba da cike guraben diflomasiyya da suka yi saura tun bayan rushe sunayen wadancan jakadu a farkon mulkin Tinubu.

Masana sun bayyana cewa sakamakon karkata da aka samu daga saman duniya, yankin Arctic, rana ba za ta fito ba a garin Utqiagvik na jihar Alaska na tsawon kwanaki 64 masu zuwa.

Sai dai hakan ba yana nufin za a yi duhu baki daya ba, domin garin zai rika samun wasu awanni na abin da ake kira “hasken asuba na fari” ‘civil twilight’ a turance wato hasken shuɗi mara kaifi da ake gani kafin fitowar rana, kamar yadda shafin Fox Weather ya wallafa.

Jam’iyyar PDP tsagin Ministan Abuja Nyesom Wike, ta shigar da kara a gaban babbar kotun tarayya da ke Abuja, tana neman a soke taron jam’iyyar da aka gudanar a Ibadan ranar 15 da 16 ga Nuwamba, karkashin jagorancin Gwamna Seyi Makinde.

Mukaddashin shugaban jam’iyyar na tsagin, Mohammed Abdulrahman, da sakataren jam’iyyar Samuel Anyanwu, su ne masu shigar da karar, inda suke rokon kotu ta ayyana taron na Ibadan a matsayin harantacce tare da hana INEC amincewa da duk wani hukunci da aka yanke a taron.

Karar ta zo ne bayan wasu koke da tsoffin shugabannin jam’iyyar daga jihohi suka shigar, suna zargin cewa gudanar da taron ya saba wa dokokin PDP.

Cikin wadanda suka gabatar da koken akwai Shugaban PDP na Imo, Austin Nwachukwu, na Abia, Amah Abraham Nnanna, da Sakataren PDP na Kudu maso Kudu, Turnah Alabh George.

‘Yan bindiga sun kai hari tare da sace mutane a ƙauyen Biresawa da ke cikin ƙaramar hukumar Tsanyawa ta jihar Kano.

Lamarin ya faru ne daren Litinin, tsakanin ƙarfe 11 na dare zuwa 12 na dare.

Jaridar Daily Trust, ta rawaito cewa akalla mutane takwas aka yi awon gaba da su maza biyu da mata shida, har ya zuwa wannan lokaci ba a samu labarin inda aka kai su ba.

Majiyar ta ce maharan sun shiga ƙauyen ne dauke da bindigogi, ta kuma bayyana cewa mazauna yankin sun shai da wa jami’an tsaro tun kafin faruwar harin bayan samun rahoton wasu baƙin duskoki da suka shiga yankin.

A wasu ƙauyuka kamar Sarmawa, Yan Chibi da Gano ma an tabbatar da sace mutane fiye da goma yayin da kusan ‘yan bindiga 50 kan babura suka yi dirar mikiya a garuruwan.

Tsohon Shugaban jam’iyar APC a Nijeriya Dr Abdullahi Umar Ganduje ya sanar da shirin kafa wata sabuwar ƙungiya mai kama da Hisbah, karkashin Cibiyar Ganduje Foundation domin karɓar ma’aikatan Hisbah 12,000 da gwamnatin jihar ta sallama daga aiki.

Wannan na zuwa ne bayan Ganduje ya karɓi rahoton kwamitin tantance waɗanda aka sallama daga aiki.

Jaridar Daily Trust ta rawaito Ganduje na bayyana sallamar a matsayin rashin adalci kuma abin da ya tilasta nemo musu mafita.

Da yake jawabi ga kwamitin da Gandujen ya kafa kan batun, ya ce sabuwar rundunar da za a yi za ta kasance mai zaman kanta da za ta ba da dama ga duk wanda ya ke son shiga ciki har da waɗanda ba su kasance cikin mutum 12,000 ɗin da aka sallama.

Ya bayyana cewa tsohon Kwamandan Hisbah, Sheikh Muhammad Harun Ibn Sina shi ne zai jagoranci aikin kafa wannan runduna, wacce za ta yi aiki irin na Hisbah, ciki har da wayar da kai, taimakon gaggawa, yi wa jama’a nasiha da kuma taimako a lokutan bukata.