A ranar Asabar, 3 ga Mayu, 2025, Brice Clotaire Oligui Nguema ya rantsar da kansa a matsayin sabon shugaban kasar Gabon, bayan nasarar da ya samu a zaben shugaban kasa na watan Afrilu da kashi 94.85% na kuri’un da aka kada.
Wannan shan rantsuwar ta kawo karshen mulkin soji na watanni 19 da ya biyo bayan juyin mulkin da ya hambarar da Ali Bongo Ondimba a watan Agustan 2023, wanda ya kawo karshen mulkin iyalan Bongo na tsawon shekaru 55.
Bikin rantsarwar ya gudana a filin wasa na Angondjé da ke arewacin Libreville, babban birnin kasar, inda mutane kimanin 40,000 suka halarta, ciki har da shugabannin kasashe 20 na Afirka.
Shugabannin da suka halarta sun hada da Adama Barrow na Gambiya, Bassirou Diomaye Faye na Senegal, Ismail Omar Guelleh na Djibouti, da Teodoro Obiang Nguema Mbasogo na Equatorial Guinea.
A cikin jawabin rantsuwar sa, ya yi alkawarin ci gaba da kokarin bunkasa tattalin arzikin kasar, musamman ta hanyar habaka bangarorin noma, masana’antu, da yawon bude ido, domin rage dogaro da man fetur.
