Amurka ta tabbatar da cewa ana ci gaba da shirye-shiryen samar da sabuwar takardar kudi da za a sanya hoton shugaban kasar, Donald Trump.
Sakataren baitulmalin Amurka ne ya bayyana hakan yayin wani taron manema labarai da aka gudanar a birnin Washington, inda ya ce tattaunawar kan kudirin ta samu gagarumin ci gaba.
A cewarsa, shirin na daga cikin kokarin gwamnati na karrama fitattun mutane da suka taka muhimmiyar rawa a tarihin Amurka da shugabancinta, kamar yadda Daily Nigerian ta rawaito.
Sai dai bai bayyana kalar takardar kudin da za a yi amfani da hoton Trump a kai ba, ko kuma lokacin da za a fara fitar da ita ba.
Sakataren ya ce hukumomin gwamnati da suka hada da Ma’aikatar Baitulmali da Hukumar buga kudade ta kasar suna duba bangarorin doka, tsaro da kuma tsari kafin yanke hukunci na karshe.
Rahoton ya nuna cewa wannan mataki ya fara haifar da muhawara a tsakanin ‘yan siyasa, masana harkokin kudi da kuma kungiyoyin kare hakkin dan adam a kasar.
Masu goyon bayan shirin sun bayyana cewa tasirin Trump a siyasar Amurka, musamman manufarsa ta “America First”, ya sa ya cancanci irin wannan karramawa.
Sun kara da cewa har yanzu Trump na da karbuwa sosai a wajen magoya bayan jam’iyyar Republican, lamarin da ya sanya wasu ke kallon matakin a matsayin tarihi.
Sai dai masu adawa da kudirin sun nuna damuwa cewa saka hoton wani shugaban siyasa kamar Trump na iya kara rarrabuwar kawuna a siyasar Amurka.
Wasu ‘yan majalisa da kungiyoyin farar hula sun kuma ce wannan shiri na iya sabawa al’adar Amurka, inda aka fi sanya hotunan shugabanni ko fitattun mutane da suka rasu a jikin takardun kudi.
Masana harkokin shari’a sun bayyana cewa duk wani yunkuri na sanya hoton mutum mai rai a jikin kudin Amurka zai iya fuskantar kalubale daga bangaren doka da majalisa.
