Babbar Kotun Tarayya da ke zamanta a Abuja ta bayar da belin ɗan gwagwarmaya, Omoyele Sowore1, kan kuɗi Naira miliyan 200, tare da sharuɗɗan gabatar da mutane biyu da za su tsaya masa, yayin da ake ci gaba da shari’arsa.
Hukuncin ya fito ne daga Mai Shari’a Mohammed Umar, kamar yadda kafar yada labarai ta TVC News ta ruwaito.
Kotun ta gindaya cewa ɗaya daga cikin waɗanda za su tsaya masa dole ne ya kasance sarki ko shugaban gargajiya daga yankin da Sowore ya fito, yayin da ɗayan kuma dole ne ya mallaki kadara a birnin Abuja.
Haka kuma kotun ta umarci Sowore da ya miƙa fasfo ɗinsa na tafiye-tafiye ga magatakardar kotun a matsayin wani ɓangare na sharuɗɗan belin.
Sai dai lauyan Sowore ya sanar da kotun cewa fasfo ɗin wanda yake karewa yana hannun Ofishin Jakadancin Amurka da ke Legas, kuma dole ne Sowore ya je da kansa domin karɓo shi kafin ya miƙa wa kotu.
Lauyan ya kuma roƙi kotun da ta saki Sowore domin ya samu damar cika dukkan sharuɗɗan belin da aka gindaya masa.
Mai Shari’a Mohammed Umar ya bayyana cewa kotun ta lura da yadda Sowore ya nuna aniyarsa ta fuskantar shari’a, domin ya bayyana a kotu da kansa ba tare da an kama shi ba.
Kotun ta ce wannan hali ya ba ta damar amfani da ikon da doka ta ba ta wajen sake ba shi beli, duk da cewa a ranar 16 ga Yuni, 2026, ta soke belinsa saboda rashin halartar zaman kotu.
Bayan bayar da belin, kotun ta ɗage ci gaba da sauraron shari’ar zuwa ranar 6 ga Yuli, 2026, domin fara sauraron shaidu da ci gaba da shari’ar.
