Ɗan takarar shugaban ƙasa na jam’iyyar NDC, Peter Obi, ya yi alƙawarin cewa ba zai taɓa fita zuwa hutu a ƙasashen ƙetare ba idan aka zaɓe shi a matsayin shugaban ƙasa, inda ya bayyana cewa zai riƙa amfani da lokutan hutu domin ziyartar sassan ƙasar nan da ke fuskantar matsalar tsaro.
Jaridar Daily Trust ta ruwaito cewa Obi ya bayyana hakan ne a ranar Asabar yayin wani taron tattaunawa da al’umma (town hall meeting) da aka gudanar a garin Kaduna, inda ya jaddada cewa gwamnatinsa za ta ba da fifiko na musamman wajen garambawul ga tsarin tsaron ƙasar.
“Kuma bari na ba ku tabbaci, a cikin shekaru huɗu, ba zan taɓa yin hutu a wajen wannan ƙasa ba. Idan zan ɗauki rana guda hutu, zan yi ta ne a Zamfara, Borno, ko Kano. Zan yi ta a Oyo ko Ondo. Haka ya kamata ya kasance.”
Ɗan takarar ya bayyana cewa ya kamata ‘yan Nijeriya su samu damar yin tafiye-tafiye a faɗin ƙasar cikin ‘yanci ba tare da tsoron sace su domin neman kuɗin fansa ba. Ya ƙara da cewa a lokutan baya ya sha tuƙin mota daga Legas zuwa Kaduna da sauran wurare, don haka ya ba da tabbacin cewa gwamnatinsa za ta kawo ƙarshen wannan matsala.
Haka kuma, Obi ya yi alƙawarin aiwatar da manufofin da za su buɗe wa kowane yaro da matashi damammaki ba tare da la’akari da asalin danginsa ko talaucin iyayensa ba, yana mai cewa, “muna son manufofin da kowane yaro zai samu damar zuwa makaranta, ƙasar da ‘ya’yan talakawa za su iya zama wani abu a rayuwa ba tare da sai sun san wani a gwamnati ba.”
