Gwamnatin Nijeriya ta amince da ƙarin kuɗin alawus ɗin tufafin kotu (robe allowance) da ake bai wa lauyoyin gwamnati, inda kuɗin da lauyoyin ma’aikatar shari’a da Legal Aid Council of Nigeria a shekara zai tashi zuwa Naira miliyan 1.
Jaridar Punch ta ruwaito hukumar kula da albashi, kuɗaɗen shiga da alawus-alawus ta ƙasa (NSIWC) ce ta bayyana hakan a cikin wata sanarwa mai kwanan wata 14 ga Yuli, 2026, wadda mukaddashin sakataren hukumar, Adighiogu A. Chiadi, ya sanya wa hannu.
A ƙarƙashin sabon tsarin, lauyoyin da ke aiki a ma’aikatar shari’a ta tarayya da Legal Aid Council of Nigeria za su samu Naira miliyan 1 duk shekara a matsayin kuɗin sayen ko kula da tufafin kotu.
Haka kuma, hukumar ta amince da Naira 600,000 a shekara ga lauyoyin da ke aiki a matsayin legal officers a sauran ma’aikatu, hukumomi da sassan gwamnatin tarayya, muddin aikinsu ya ta’allaka ne kai tsaye kan harkokin shari’a.
Sabbin kuɗaɗen za su fara aiki daga ranar 1 ga Janairu, 2027, kuma za a biya su ne daga kasafin kuɗin gudanarwa (overhead) na ma’aikatu da hukumomin da abin ya shafa.
Ƙarin alawus ɗin zuwa Naira miliyan 1 ya kasance sama da adadin Naira 300,000 da aka ruwaito ana biya a baya, wanda ke nufin ƙarin Naira 700,000, kwatankwacin kusan kashi 233 cikin 100.
A shekarar 2021, tsohon babban lauyan gwamnatin tarayya kuma ministan shari’a, Abubakar Malami (SAN), ya bayyana cewa kusan lauyoyi 860 da ke aiki a ma’aikatar shari’a sun cancanci Naira 300,000 kowannensu a shekara a matsayin robe allowance, wanda jimillar kuɗin ta kai kusan Naira miliyan 258.
Sai dai sabon bayanin NSIWC bai fayyace cewa Naira 300,000 shi ne tsohon adadin da ya shafi dukkan bangarorin lauyoyin da sabon tsarin ya kunsa ba. Saboda haka, adadin Naira 300,000 ya kamata a ɗauke shi a matsayin kuɗin da aka ruwaito a baya ga lauyoyin ma’aikatar shari’a, ba wai tsohon adadin da ya shafi kowane rukuni na ma’aikatan shari’a ba.
Robe allowance dai kuɗi ne da ake bai wa lauyoyin da aikinsu ke buƙatar su halarci kotu cikin tufafin da dokokin aikin lauya suka tanada, musamman yayin da suke kare muradun gwamnatin Nijeriya ko hukumominta.
Hukumar NSIWC ta ce duk wata tambaya da ta shafi yadda za a aiwatar da sabon tsarin ya kamata a miƙa ta gare ta.
